未来ガジェット研究所

呢個出撃任務neta木村昌福提督既成名作戰， 阿武隈作旗艦，帶同響，初霜，若葉，五月雨，島風攻略3-2既麻煩地圖。 門神無事過渡，之後要睇羅盤娘面色。 竟然第一次就放人。 入左王就輕鬆解決。 阿武隈要餵mry先識cut in。 完成。 獎品時間。

第二十七驅逐隊出撃任，白露"改"旗艦，時雨，春雨，五月雨加任意兩艦攻略2-3地圖。 2-3地圖據講2空母會有帶路作用， 白露係1-5升到改，五月雨係岩岩刷閃先搵返黎， 春雨同時雨係親生女。 2-3地圖唯一既敵人係羅盤娘，2出1入Boss點。 獎品時間。

2016年4月22日維修後既新任務， 完成左編成任務"強行高速輸送部隊を編成せよ！"之後， 任務要求川內改二，時雨改二，江風改二，二位驅逐艦一齊攻略4-1地圖。 任務要求既兩位驅逐艦係白露型既關係，其餘兩位都揀左白露型入隊， 由於Boss點有空母既關係，剩低既一個席位留左俾加賀， 一來可以在Boss點搶制空唔洗俾人二連，二來可以洗地加強攻擊力。 川內用連擊裝備加夜偵，時雨江風春雨用長十炮加電探，POI我堅持俾返佢用POI炮。 爆雷? 不認識的孩子呢。 輕鬆到Boss點。 輕鬆解決。 獎品時間。

話說都有一段昤間無睇過新番動畫， 聽朋友講話今季有套新番講班JK去揸船， 作為一個提督就梗係要download落黎睇下。 點知呢套新番相當高質，我已經決定左五月去東京砲雷擊戰果陣去多次橫須賀睇艦， 順手行下實景。 岩岩睇完第二集，唔討論劇情費事劇透， 除左一個畫面係cap低左既， 秘書艦 秘書官納沙幸子係到演緊獨角劇果陣， 佢做左一個下潛既姿勢而個姿勢係跟足潛水既標準， 右手舉高BCD放氣，左手捂住鼻平衡壓力，個人保持垂直用雙腳控制下潛速度。 Btw有幾個艦娘過左呢邊做兼職， 有人話艦長岬明乃好似羅盤娘， 有人話副艦長宗谷真白好似矢矧， 我個人覺得機關助手黑木洋美最似能代。

寫開澳門食食食食系列順手寫埋我葡佬同事都推介既葡國菜Castico， Castico係氹仔官也街附近，如果食厭左小飛象可以行多兩步過黎試下， 不過間舖唔算好多位，夜晚黎book定位會好D，我自己就食午餐多。 侍應講英文同葡文，有中文Menu。 我幾鍾意呢份Castico Steak， 切果陣記得 切埋夾住既火腿同芝士一齊放入口， 同埋我發覺好多葡菜都有隻煎蛋。

續 上文 ，係營地街市食完牛什有D唔夠喉， 我一進入左假期模式可以一日食十餐。 突然想食個蛋治，一於行去南屏雅敘。 係營地街市沿大街一路行，經過關前正街同果欄街， 見到時香花生轉左，十月初五街街口轉右就會見到南屏雅敘。 南屏雅敘據講係澳門最早既冰室， 係香港都好難搵到呢D咁有歷史既冰室。 佢位於既十月初五街(Rua de Cinco de Outubro)都好有意思， 係為左紀念葡萄牙革命係1910年10月5日推翻君主曼努埃爾二世， 建立共和政體而命名，詳細可以參考 1910年10月5日革命 。 南屏雅敘最出名係蛋治，最岩加多杯齋啡碌下手機休息下， 我另一個鍾意既地方係佢有自己焗既麵包， 食完順手買左D返去俾伙記做下午茶。

上個星期去完快閃新加坡食食食食， 今個禮拜因為工作關係週末返唔到香港， 星期日訓醒又牙痕，就搭車過澳門街搵野食。 呢間梓記牛什我個人幾鍾意食，係Galaxy百老匯果邊都有分店， 澳門街呢邊既舖頭就係新馬路既市政大樓。 即係香港將運動場/街市/圖書館/熟食中心放埋一齊果種市政大樓， 打波會聞到有魚腥味，睇書會聽到有斬肉聲果種。 最基本既牛雜河，盛惠MOP25， 食D鍾意食既野算係星期六日返工既一D自我安慰。

最尾一日可以訓到自然醒，諗過度過酒店唔係貴所以加多左一晚， 熱得滯可以返去訓晏覺再游下水， 順手book埋車去機場。 食個早餐先再諗下一陣去邊， 以前係香港做野飲杯M記即磨咖啡就已經好滿足(唔係即磨果D難飲過屎水)， 而家係澳門做野就跟左葡佬老細飲Espresso， 呢次去愛上左越南咖啡，買左三個滴漏咖啡壺同兩包咖啡粉返宿舍DIY。 香蕉Pancake .... 好滯.... 食完野就去行下會安古城，第一站係日本橋(來遠橋)， 由會安既日本商會係1595年建成，雖然而家見到既唔係最古老果條(重建過)。 果陣日本人已經黎到越南做生意，係傳統戲劇都有出現日本人角色。 會安個環境唔差，無上次農曆新年黎咁多人， 可以慢慢行，係曬左少少。 俾50,000VND可以試坐洗頭艇，佢會唔會夾你去支那就睇你造化。 曬到啊媽都唔認得，有頂越南草笠係差好遠， 上次係美山聖地買左頂，拎左返屋企。 周圍都係古厝，呢間好似係博物館黎， 要買飛所以無入去。 會安古城隔離係個市場，就好似胡志明市個檳城市場咁一樣係好多人同好混亂。 仲有半個區係熟食檔，不過呢到唔係好夠膽食，一定屙死我。 仲有一部分賣鮮肉同魚，唔係好想行落去驚一陣食唔落飯， 拿拿淋行返出去。 越南由南到北都係咁，一街都係電單車。 行過遊客中心見到有個水上木偶劇既飛賣， 個劇場仲係酒店附近，又唔係貴就買張飛等睇戲(夜晚先開場)。 dafuq...... 行下行下去返潛水舖門口，索性入去吹下風扇同飲杯啤酒， 順手寫埋張postcard同上陣網。 寫完postcard就搵郵局買郵票，呢間郵局都幾隱閉，入去條路九曲十三彎， 但個綠化做得好好。 好到你以為佢唔係一間郵局。 行左陣見肚餓就係街邊食個Pho。 越南街邊檔大部分都係咁樣，一個檔仔加個爐就可以賣野， 唔會有人叫你俾一百萬出黎買架美食車.... 呢檔算幾特別，除左定番既香草同菜之外仲有醃芽菜同醃白菜，仲有杯茶。 買果陣都無留意，原來張郵票係日本橋黎。 寄出，上次係河內寄大約兩個星期