201605 橫須賀舞台探訪x砲雷撃戦二十五戰目: 鐮倉江之島

行完舞台就去海邊行下，但好可惜入手左部NEX6咁耐都未有一支長鏡，
其實係得旅行會拎出黎用，
沿住海邊可以一路行返去JR橫須賀。

竟然俾我睇到潛水艦出海，距離太遠同潛艦無咩記認，
推斷係親潮級潛艦，因為蒼龍級個尾舵係X型。

E7未開始撈親潮未抱IOWA返屋企....

另一邊海自既橫須賀地方總監部就泊左DDH-183出雲型一號艦出雲，
佢個妹DDH-184出雲型二號艦加賀上年八月下水，預計2017年服役。

出雲用日本制令國出雲黎命名，出雲國大約係現時島根縣既位置，
上一代既出雲係英國出世既裝甲巡洋艦，曾經係對馬海峽海戰同三笠一齊打俄佬。

加賀都係用日本制令國加賀黎命名，加賀國大約係現時北陸石川縣既位置，
上一代既加賀係日本出世既戰艦航空母艦，曾經係上海作戰，珍珠港空襲，達爾文港空襲等戰役擔任重要角色。

一航戰的榮耀

橫須賀車站都係其中一個高校艦隊既實景，呢個位一睇就記得上次黎過。

時間尚早就搭車去江之島行下，黎左幾次神奈川都未去過江之島，

搭左幾個站去鐮倉轉江之島電鐵，第一站去左男兒當入樽既舞台 - 鐮倉高校前踏切，

話就係話舞台其實我未睇過呢套漫畫。

車站既一個食店既宣傳板，好有日本人既風格，

"加油啊日本，我地停電果陣都照常營業嫁!"

好鍾意坐呢D妹下妹下既電車，坐過最開心果次應該係幾年前去20 Tower果陣既銚子電鐵，

有時間會去多次千葉行下海邊。

講到好似住深山一年都見唔到一次海咁

個環境幾舒服但係好大風，
出發果陣澳門好鬼熱所以剩係著左一件長袖衫無帶褸，凍到啊媽都唔認得。

一陣就去行下江之島。

鐮倉高校前踏切，凍到啊媽都唔認得，睇完就走返車站。

影下車，不過天氣麻麻地。

搭多幾個站去江之島，事前無做過Research落左車先再諗。

凍得滯，買罐熱飲暖下個胃。

有個專用位置放低寵物。

行過左呢條橋就係江之島。

個感覺有D似去左有馬溫泉再mix埋京都嵐山再mix東尋坊，
空氣有D Manzanilla桶同Talisker 海水味，
日本遊客同外地遊客一半一半。

江島神社，唔想行既佢隔離可以俾錢搭扶手梯。

近海地方一街都係賣海產。

牙痕，開始搵野食。

個人覺得扇貝好食D，螺肉有D靭。

磯波，IJN特I型驅逐艦。

朝潮，IJN朝潮型驅逐艦。

最後揀左食朝潮，食到成口都係白飯魚。

食完正餐就梗係要食甜品。

食丸子但差左杯茶，係差咁D，
岡山城入面有得食丸子配咖啡，唔錯嫁個感覺幾過癮。

行返出去果陣開始多人，最驚就係多人既環境，拿拿聲走人。

唔等回程去鐮倉，直接坐去大船轉橫須賀線。

個Stopper有站長坐鎮。

轉返橫須賀線去橫須賀。

Offtopic早幾日橫須賀線壞左門，JR搵塊布攔住道門照樣開車，
好似去左印度搭火車咁。

抽車太長既關係，停田浦站果陣頭一卡會係隧道入面開唔到門。