201606 台北食食食食: MFM-TPE，秋吉串燒

又係時候要起行去台北食下野放下假，買買埋埋IT既平飛就飛返轉，
Project 忙到癲晏就飯都未食，索性入Lounge食野當埋晏就飯。

總有一班趕住去死既人排長龍上巴士。

A320都唔會諗住佢突然變得好好坐嫁啦...

個零鐘機無睇左幾多頁漫畫就已經到左台北，
申請左張快速通關之後係桃園入境方便左好多，
諗起上幾次浪費人生咁排隊真係...

今次都係住返忠孝敦化既凡登旅館，今次分左上十四樓，
感覺麻麻地無上兩次咁舒服。

放低D野就去秋吉食野，住忠孝敦化就係因為附近好多野食，
後院(威士忌吧)同誠品都係步行距離，一個唔覺意係後院醉左都返到酒店。

秋吉既串燒幾高質，咁當然同日本既居酒屋係有D分別既，
例如佢無枝豆同炸竹筴魚(佢老豆佢無枝豆都叫自己做居酒屋，講出黎果陣面唔面紅)，
我好鍾意佢地整既清酒煮蜆，但杯Highball真係麻麻地。

後尾我都係頂唔順佢杯Highball，寧願去返飲啤酒，
飲完酒就返去大覺訓，訓醒先諗聽日去邊。