202510 作為酒鬼一生人要去一次既慕尼黑啤酒節：Day 0 出發前韓國漢城彈丸出張

話說出發前一星期係京都做緊野果陣收到老細message係到噓寒問暖，
我「你想講咩就講唔好兜圈(´･ω･`)」
老細「有無時間下星期頭去一去漢城個現場見下個客(ゝ∀･)⌒」
我「( ╯' - ')╯ ┻━┻」

呢條友無事獻殷勤我都知無好野，拿拿聲做完野改新幹線星期六返東京再星期一飛漢城。
東京出發搭日航係羽田飛金浦，金浦機場感覺係似羽田機場近市區好多同地鐵直通，
仁川機場似成田，由市區出發機場巴士要差唔多一個鐘車程。

習慣一早入機場係Lounge做下野等上機仲有free flow野食野飲仲可以沖個涼刷個鞋，
Oneworld羽田兩個Lounge，因航自己既Lounge同日航Lounge，
作為因航會員雖然我成日鬧但無可否認因航既Lounge係好四正。

羽田CX Lounge雖然只係Business 但係咁多CX Lounge之中服務同設備都排得好前。
好鍾意食日航咖喱飯同羽田始終都係日航Flagship機場，
論用餐區裝修比The Pier / CX 羽田Lounge都無咁精緻優雅，比較似食堂或者一般餐廳。
論沖涼房比The Pier亦稍嫌不足，但野食質素同四大啤酒牌子既生啤機齊備加分唔少。
我亦非常鍾意Lounge個入口既香薰，鍾意到係買左同款擺左係屋企（機內販售有賣）。

睇住飛機食下壽司飲杯啤酒係開心既。

PK-GIF 印尼政府既機

747 ヾ(*´∀ ˋ*)ﾉ

日本出發前一定一定要食個日航咖喱飯先完成個「出国の儀」(*´∀`)~♥

食完野沖個涼鬆一鬆，
其中一個我覺得日航Lounge沖涼房唔夠好既地方係佢無咩位俾你放衫放袋，
因航The Pier First 有長椅可以沖完涼坐係到攤一攤個人，
日航Lounge呢個沖涼房得張圓櫈好似係越南街邊大排檔咁，
牙刷同剃鬚刀都係係reception拎鎖匙果陣問佢拎埋，
我隨身有牙刷袋所以無問題。
另The Pier First係有Housekeeping帶你入去開門俾你，日航Lounge要自己拎鎖匙。

但佢毛巾係用今治タオル我係非常鍾意，
亦好推介大家去用呢個牌子既毛巾，夠軟熟同洗完用heat pump乾都唔會好快起毛釘，
我自己面巾沖涼巾同手巾仔都係用今治，日航出既手巾仔都係今治我有幾條用緊非常舒服。

好鍾意呢支成碌實心鋁既鞋抽，fing果陣發發聲好岩擺係更衣室用黎扑鳩老細同on9客ᕕ ( ᐛ ) ᕗ

沖完涼仲有時間，日航Lounge既最入面有個幾優雅既空間，
British Pub / 酒店Executive Lounge既裝修風格，
我個人意見係呢部分既Lounge先能夠叫得上First Lounge。

寫字檯上係日航A300拆落黎既儀錶，整個裝修風格我都好鍾意，
遲下自己起注文住宅既話書房跟呢到去做就差唔多。

出面有staff可以刷鞋但要預30min以上，本身都有刷開既就好快搞掂。

講開又講下，
威士忌有Bowmore 12同Chivas Mizunara 18我本身兩款都好鍾意，
Bowmore 12新開既泥煤係好強勁even我覺得有d刺鼻，
但擺耐左慢慢d蜜糖味滲出黎但個基底既泥煤減弱左之後個體驗係相當唔錯。
Mizunara水楢個香味唔似一般雪梨／橡木有少少有遠東既香料味，
我平時屋企好鍾意用佢黎做Highball。

呢d環境飲啤酒就大煞風景，整返杯Bowmore hea下。

Gate 134 搭巴士出公海。

日航既787

HND-GMP係Regional J但比因航777 / A330既好好多，足夠位置放平伸直對腳。

Online check in 後有email俾個WiFi access code但個接收差過因航好多。

上機得熱毛巾無welcome drink，無拖鞋無樽裝水，有枕頭有毛毯，

CA會黎落單食咩同飲咩，ISM行埋黎greeting「多謝選搭日本航空」。

羽田一push back 就已經係跑道咁滯，仲見到無雪既富士山。

話說我影緊個富士山果陣，見隔離個妹仔望下望下，

我問佢「要唔要幫你影」佢直頭俾左部手機我去影。

岩岩讚完因航既Lounge，老老豆豆因航既機內食真係好劣，

就算係長途J都無咩邊次真係好食，

但日航就算係短途J even Econ都係好精緻同每樣配菜都好有「日本感覺」。

9月係壽司配茶碗蒸同麵豉湯，

野飲揀左東洋美人，山口縣萩市既百年酒造，

有款叫「東洋美人 純米大吟醸 壱番纏」既我極度推介，

當年山口出身既安倍首相同普京開會食飯既餐酒就係佢。

食完野ゴロゴロ緊果陣，隔離個妹仔突然間問「要唔要食香口膠」，

我第一個諗法係「我係咪食完野個口太臭搞到人地」，

但佢又主動傾下計，韓國妹豬但日文英文流利，係日本生活韓國日本兩邊跑，

好鍾意去香港even係日本佢會去搵「香港料理」，交換左Line約左佢下次去神保町搵野食。

佢好鍾意行美術館睇油畫尤其係印象派，傾左陣莫奈同塞尚就已經final approach，

個妹豬都幾飲得我refill都係100mL佢係一支支細支白葡萄酒咁飲。

佢屋企人係機場接佢，仲一路係line教我點搭車去酒店。

其中一個我好唔鍾意去韓國出張既原因係好似盲左啞左咁，

係IT業界有個Terms叫CJK - Chinese, Japanese, and Korean，
我日文中文都無問題但韓文真係企左係到（物理），
無Chatgpt真係連食飯搭車都有困難。

係金浦搭地鐵出去江南係搭9號線，機場個站係尾二個站，
沿路既指示你唔會搵到呢個月台係去市區定去總站，

我本住「最多都係搭回頭車」既精神求其上左車，

佢又有分快速同各停，要望實路線圖先知邊個站落車，

d mon同廣播又全韓文真係麻煩。