未来ガジェット研究所

好耐無寫遊記，今次想講下上個月去荷蘭既短Trip， 上年既波蘭遊記有提過歐洲對猶太人「較友善」既國家除左波蘭仲有荷蘭， 係阿姆斯特丹有一個博物館專門去講有關荷蘭係二戰時期既事，而好多都同猶太人有關。 係燕豪芬（歐聯？）既菲利浦（燈泡果間）博物館都有講有關猶太人， 想藉呢個機會記錄同補充下。 上一次既波蘭遊記： [毒撚出城] 第一次踏足內心毫無波蘭 - 分享自 LIHKG 討論區 https://lih.kg/3774744 由23年起每年生日都會飛一次荷蘭， 個生活幾chill好岩輕鬆trip唔係日日趕行程， 朝早飲杯啡食個早餐，行下博物館， 夜晚飲杯Jenever （荷蘭既Gin）又一日。 但因為已經第三次去， 大路景點例如風車村／梵高博物館果d我都無再去， 如果有興趣既請留言我稍後寫埋。 簡介一下旅遊相關資訊 荷蘭係歐盟區，貨幣用歐元，大部份地方都可以通行信用卡， 因為治安同處理現金既行政費太貴，多左好多舖係講明card only。 我呢三次都剩係洗衫舖有用過現金。 荷蘭本身係一個由大航海時代就活躍於海上貿易既國家， 對外人既態度相比起比利時／德國會更友善， Menu到所有UI同博物館都有荷蘭文同英文對照， 同城市大部份既人都英文通行，基本無咩語言障礙。 同行朋友識英日德中四個語言， 一路上同我解釋左好多有關德文同荷蘭文既相似性， 而又點解今時今日既英文咁多特殊情況既發音同造字，令旅途生色不少。 消費比起平時生活既日本非常昂貴， Cafe一杯Latte要4歐，兩個人食個奄列多士加杯野飲， 一個早餐可以上到15歐 ＝ 2500羊， 係日本奢侈極去椿屋咖啡食早餐都係1500羊。 有朋友係阿姆斯特丹住，其中一晚約左佢出黎食飯， 了解左好多荷蘭本地人先知既野，其中一個係「荷蘭真係無咩家鄉菜」。 出名既有炸肉丸(Bitterballen)，醃魚(Soused herring)， 就真係得芝士同Pancake。 個飲食文化受周邊國家影響，阿姆斯特丹市內亦有好多其他國家既菜系， 印尼菜，印度菜同亞洲餐廳都多（朋友話有間韓國餐廳係香港人開）。 阿姆斯特丹市內有地鐵同路面電車， local人係踩單車為主，大部份路面都有單車徑，用紅色做標示。 有時佢地都踩得幾快過馬路記得望左右先行。 城際交通非常方便， 主要大城市海牙，鹿特丹，烏德勒支Utrecht，燕豪芬有Intercity（特...

話咁快就到旅程既尾段， 每次到呢個時間我由一起身果刻開始就已經會黑口黑面同無咩胃口， 有次係酒店check out，之前幾日都同前台有講有笑， 俾返卡佢果陣可能個負能量氣場太強， 前台個經理走埋黎問係咪有d咩我地做得唔好， 我話無野唔洗擔心，佢仲入office 拎左幾粒糖同朱古力俾我。 一早起身係廚房沖緊咖啡果陣俾個SMS嚇親， 出面陰天但無雨，同行去火車站其實好近。 我仲send去問個host d交通會唔會有問題， 佢話好平常唔洗擔心，真係有d咩事停左火車既搭的士even佢可以黎車我入機場。 比起波蘭，南韓係更濫用緊急通報既地方， 早幾日收到個covid 19既push，心諗.... 同樣搭機場火車入去機場，早左到同機場唔係話十分大， 搵左間餐廳坐下飲個湯，佢話係雞湯配麵， 個味道exactly係公仔麵雞肉味既湯， 唔識用匙羹「畢」麵食，彈到一面都係。 Check in同過保安檢查都好快， 華沙去赫爾辛基呢程係歐盟既「內陸機」所以係唔洗出入境。 華沙機場有兩個lounge，佢係LOT波蘭航空既老家但佢係烏合聯盟既人。 個Lounge整體體驗唔錯，野食酒水充足，WiFi強勁， 時間唔夠試唔到佢個沖涼房。 整返支麥芽飲品休息下。 個lounge wifi 係 F rédéric Chopin 1849 不得了，佢有個梳化區原本以為個酒櫃係裝飾，點知係試飲區黎， 仲要每支都有label話你聽免稅店有賣，咩number同價位。 我本住童子軍日行一善既精神，幫佢飲埋剩低呢啖等佢可以換過支新既。 歐盟區外歐盟區內有唔同價，稅既%都幾誇張。 去赫爾辛基係Embraer 190， 無記錯應該好多年前坐華信去台中坐過， 2-2 位都唔錯幾舒服。 入座率唔高，架機夠細可以望到入cockpit。 好～大舊黑雲 爬升過左雲層就平安 兩個鐘機恰下就到，行李係直寄到香港，係赫爾辛基要出歐盟境同過多一次保安檢查。 HEL non-EU呢邊有間奇怪既亞洲菜餐廳，咩都大兜亂咁。 去AY Lounge 休息下，仲有幾個鐘先上機， 個lounge比EU果邊大好多，入面既客大部份面孔都係亞裔人樣。 野食中規中矩，照舊係有麥芽汁放題。 offtopic關於航空公司Lounge，我個人認為沖涼房係一個幾重要既設施， 可以俾個客係機場合法地全裸，釋放左d欲望個社會少好多變態， 長途機上機前沖個涼換套衫輕鬆d既...

今日都係市內行博物館既悠閒行程， 計劃去參觀文化科學宮，即係早幾日話蘇聯起黎俾波蘭係市中心好肉酸果棟。 搭幾個站電車，點知行左一個站就突然停哂仲塞死哂d車， 我見個個都落車就跟住落，個司機用波蘭文廣播聽唔明， 距離唔係話好遠，我就跟住兩三百個去返工既波蘭人一齊快步行去中央車站。 係博物館附近食個早餐，幾豐富先黎一個早晨全餐加杯花茶（唔太岩口味）， 再加個湯送埋d麵包，食完飽到隻橙貓咁。 文化科學宮，蘇聯時期既其中一個象徵式建築物， 我中文唔叻表達能力唔好，但蘇聯／共產主義既產物總係有一陣「蘇聯味」。 入面比較似科學館，好多中小學生黎參觀， 同唔知點解有某兩個展廳有d高頻聲搞到我頭都痛埋， 所以成個館都無咩影相。 其中一個黎既原因係呢部Enigma，第一次見到實物， 個內心係同見到EF63重連推189上碓氷一樣咁激動。 Enigma係二戰時期係一種高度非常複雜既加密機器， 最初係由德國工程師施密特係1918年發明。 Enigma主要喺第二次世界大戰期間被納粹德國廣泛使用， 所有軍事通訊都以加密形式發出，唔似日本係一開戰就俾盟軍破解左， 山本五十六提督都係因為通訊被破解，行程敗露而被美軍狙擊戰死。 Enigma通過一組旋轉嘅轉子同可更換嘅插䕶板黎加密同解密信息， 每日會有唔同組別既密碼（插線設定），即係每日既加密方式都係唔同， 令佢既密碼極其難以破解。 但盟軍喺戰爭期間成功破解， 由波蘭密碼學家馬里安．雷夫斯基（Marian Rejewski）同其後嘅英國密碼破譯組， 特別係艾倫．圖靈（Alan Turing）領導既團隊係布萊切利園（Bletchley Park）所達成。 （The Imitation Game有詳細描述，CX IFE有得睇） 佢地既工作對最終戰勝納粹德國起到至關重要嘅作用， 係歐洲戰場拯救左好多補給船同運兵船遠離U boat既魔爪， 同美國係日本投下原子彈一樣提早二戰完結。 如果大家係做技術既，應該會明見到Enigma實物果種激動， 先係諗到點樣去做Enigma已經係癲， 諗到點樣每日行一個algorithm去破解係仲癲， 我差d就係現場跪低哭𠹌咗唔係講笑。 行完博物館就梗係要補充下水份， 搵左間手工啤酒吧休息下。 飲完發酵飲品有d肚餓，搵左間波蘭菜餐廳食下餃子。