202510 作為酒鬼一生人要去一次既慕尼黑啤酒節：Day 4 Sea Life 啤酒節第二回

星期日既德國基本除左食肆同油站都唔開門，
全民都係休息mode，起身飲杯咖啡暖下個人。

琴日行博物館有d太Chur，決定搵個唔係博物館既景點hea下。
係BMW附近既水族館都係Museum Pass包既。
去玩既話可以download佢個app，有AI認魚幾過癮，
雖然有時會認左條魚做八爪魚 i.e. 九唔搭八（爪魚）
同埋要追住條魚一兩秒先認到但整體係幾好玩。

有個諗法係AI認魚但係認街市d魚，
最好係可以講埋條魚係咩味道類型（油定乾）同煮法。

個館入面偏暗同掛住玩個認魚APP無咩真係影相。

如果係紅點就變左零戰。

行完水族館咁岩中午同星期日係啤酒節最後一日，決定去趁下墟。
好死唔死又落雨，有1／3 戶外既位置濕哂唔坐得，
本身已經旺場變左旺上加旺。

行左好多個場都無位，連企位同搭檯都無。
但停左雨咁岩係戶外搵到兩個唔濕既檯，有理無理坐低左先。

先來一個Maß

個個場張Menu都好骨子。

同對面既德國夫婦吹下水（的確英文水平唔錯），
講下德國旅行講下飲食，星期日下午飲下啤酒吹下水，夫復何求。

btw

之前提過Weißwurst習慣係上午至中午食，我原本諗住Order點知真係會無，
連menu都有寫係1400前供應。

咩叫醉左，就係搭U-Bahn（一個站）果陣搭錯方向，
結果行左成半個鐘先返到酒店訓覺。
訓左兩個鐘覺肚餓，突然好想食Pho，
好處係Pho同印度野係大大細細既EU / AU城市都會搵到，
直接行去食個Pho。