201801 馬航商務位沙巴之旅: Day 5 KLIA Express，錫米才肉骨茶

落機就唔去多次Golden Lounge，直接搭KLIA Express出市區。

係counter可以買到來回飛，可以簽卡之餘仲可以平10MYR。

搭lift一定要揀有KLIA Express既呢邊，另一邊去唔到閘口。

或者搭扶手梯。

 吉隆坡既鐵道都幾完善，旅客要去既地方基本都有鐵道去到。

機場線有特急有普通(佢日文個牌真係寫特急電車同普通電車)，
今次搭特急直接出總站KL Sentral。

車門既設計唔錯，拖喼唔會卡住係空隙。

但個位既設計都幾奇怪，可能我坐尾車係M車，
台車上面既位係升高左。

半個鐘就到KL Sentral，係吉隆坡都係住Le Méridien，
係正車站對面，行過天橋就到。

Check in 完放低行李就出去搵野食，KL Sentral有個好處係咩線都有得搭，
個站新呢邊都整得唔錯，幾開揚同自然採光。

搭KTM，馬來西亞國鐵去 Salak Selatan食肉骨茶，
個車站設計都幾差，因為地下化既關係成個月台都好焗，同台北車站咁上下。
車既狀況都麻麻地，好多窗口玻璃都爆左但無維修。

係自動售賣機買飛，張飛係個黃色token，
入站拍卡，出站放返入機佢會回收返。

搭左廿分鐘咁上下就到Salak Selatan，
由市中心一下就變左近郊月台。

望落好似好多設施，但好多都鎖左，
例如VIP房同荷物房。

岩岩好中線有車回送。

行去餐廳既途中經過一條有咁上下既天橋，
仲係用緊紅磚鋪面。

呢間錫米才肉骨茶都係係Google 搵返黎，
特登搵左係潮式肉骨茶，最鍾意食胡椒式既肉骨茶。

呢間錫米才肉骨茶真心推介，胡椒味恰到好處，
亦都係我食過咁多間肉骨茶第一間有菜飯既，
菜飯同肉骨茶又真係幾夾。

呢間都係講廣東話就得，周圍幾檯都係用廣東話傾計。