202405 波蘭華沙歷史行： Day 1 香港 -> 赫爾辛基 -> 華沙
已經好多年無寫過遊記，係曼谷休整緊出面落大雨，正好寫下遊記。
有自助麥芽汁機，加分！
.jpeg)
今次去波蘭旅行係受旅遊台既一個遊記post啟發，感謝樓主分享。
波蘭，
對我黎講個印象除左Poland ball、成日俾人瓜分同小火車之外，
其實對佢無咩認識，亦未係旅遊清單上面（某程度係因為因航無直航），
係睇完個post同google完之後發現波蘭歷史上面佔一個幾重要既位置，
由波蘭立陶宛聯邦，到兩次被瓜分，然後成為蘇聯加盟國再到脫離獨立再入歐盟，
係更早之前（十世紀前）既猶太人遷徒史同十字軍東征已經有「波蘭」呢個地方同人參與，
成件事幾吸引到我，於是見到五月中有時間就放左一個星期假去行下。
得著幾多，亦解答左我其中一個係西歐睇左好多博物館都解唔明既問題，
「點解猶太人咁乞人憎d歐洲佬要屠殺佢地」
簡介一下旅遊相關資訊
波蘭係歐盟區，但唔係用歐元，用波蘭茲羅提（Polski Złoty PLN），
Złoty係波蘭文解黃金，1 PLN ～＝ 2 HKD。
同西歐一樣華沙同大部份地方都可以通行信用卡，
我換左100USD 現金但剩係用過一次係博物館d手信店買野。
華沙同城市大部份既人都英文通行，
同荷蘭一樣Menu到所有UI同博物館都有波蘭文同英文對照，
佢地好多都識聽英文，講可能難少少同口音好重但佢地理解你講緊咩。
交通工具既售票機有齊波蘭文，英文，德文，烏克蘭文同俄文，
基本無咩語言障礙。
消費唔貴，食一餐大約40-60蚊港紙，
波蘭d野好岩我食，我自己係好鍾意湯類料理，
老火湯冬蔭公等等咩湯都岩飲。
波蘭都有好多唔同款式，紅菜頭湯，牛肚湯等等，
佢地早餐好多時係一個湯一個包就係一餐。
城際交通非常方便，主要大城市從華沙每個鐘都有特急開出，
交通工具既保養亦做得好好，至少無荷蘭比利時果d成車都係塗鴉，
用佢地個app Jakdojade 可以買到哂華沙市內同城際火車既飛，
大部份車都係指定席，特急基本上車掌都會黎查飛，
部份長途車有餐車同車內販售，整體體驗比西歐更好。
華沙市內交通亦非常方便，火車，路面電車，巴士都係時限票，
分20分鐘 ／ 75分鐘時間內係指定區域通行，
「指定區域」只有Zone 1 同Zone 2，
華沙機場WAW同大部份景點都係Zone 1，
除非你係飛Modlin Warszawa WMI先係Zone 2，
下面張圖咁多日我都無睇過，因為知唔會出到去Zone 2。
------------------------------------------------------------------------------------
今次飛芬蘭航空，一來時間唔錯二來好憎去中東（公司本社係中東，去親都係煩野），
香港夜晚八點出發，第二朝六點到赫爾辛基，等一個鐘轉機去華沙，九點前就到。
AY佢雖然係OneWorld叫做Full Service Carrier但佢個最平plan同廉航一樣係得手提行李，
我本身因航會員可以用OneWorld福利拎行李quota同揀位 : )
AY係香港呢邊地勤係外判，開好少位得三個俾商務／頭等同三個俾Econ ／白板，
我大約五點到機場已經排左到好長龍，好在有會員隊唔係搞成個鐘都似。
Online check in剩係可以check in 到由香港去赫爾辛基，
到機場先可以check in埋轉機果段，一次過拎兩張boarding pass，
行李亦會直掛去華沙。
AY係香港無自家Lounge，佢地default係去Plaza Premium不過你係可以去因航Lounge，
咁就梗係去返The Pier食個飯飲杯野沖個涼，The Pier夜晚Menu基本都係燒味飯同湯。
AY用A359飛HKG-HEL，我揀左最前排in case想出去廁所都鬆動d，
上機一人一支維他水。
起飛無耐就派餐，我平時成日笑因航d飯係「餵狗都踢開個兜」，
我估唔到一山還有一山低，AY呢個「飯」我剩係試完味就冚返埋，成件事好唔開胃，
唯一可以食既係果條Kitkat。
呢set木餐具又係廢到無倫，篤又篤唔入拮又拮唔穿，谷鳩氣。
早餐亦無咩期望，都係開黎試完味就冚返埋。
訓完一覺，日出就差唔多到赫爾辛基。
今次係AY 359 OneWorld 塗裝機。
到左芬蘭即係已經入左申根區，入境同出境印都係芬蘭而唔係波蘭，
芬蘭去波蘭呢一程係同國內線一樣唔洗出入國查驗。
赫爾辛基係AY大hub，佢地近年好積極開亞洲航線做轉機，
新加坡，日本東京大阪明古屋，新加坡都有飛，
朝早六點排我前面過關既係一團日本團，全部60+同拎支JTB旗仔。
岩先都有講到赫爾辛基係AY既基地，通常係間航空公司既老家，
個Lounge都係最豪華最多設施。
我今次人生路不熟一落機就去左過關入EU境先，
因為之前幾次係荷蘭入境都要排好耐驚miss connection，
好在今次10分鐘就搞好哂。
講到芬蘭，最symbolic既除左白色死神同太子芬蘭浴，一定係姆明，
機場都有姆明專門店。
野飲機都有姆明版
AY Lounge 係gate既上一層，
面積唔大同幾多人，野食都係簡單沙律、麵包配液體麵包，
個設計同HND D國內線Lounge差唔多，回程果陣係non-EU果邊睇下會唔會有d咩唔同。
時間唔多，食完野就去gate，
赫爾辛基去華沙都係OneWorld塗裝機A319。
.jpeg)
入座率唔高，我坐A位BC都無客，
一貫A32X系列既leg room。
頭先寫漏左，AY既酒精飲品係要額外加錢，
申根內呢程係咖啡同茶都要，雖然兩個鐘同岩先食飽左液體麵包。
起飛後會serve一杯藍莓汁同水，個藍莓汁係AY既名物黎，
佢地自己brand有AY logo係個盒。
兩個鐘機，有少少陽光曬住暖暖地幾好訓，
話咁快就到左波蘭，第一次踏足既國家。
華沙機場既全名係Lotnisko Chopina w Warszawie
Lotnisko = Port lotniczy = 機場
Chopina = Chopin = 蕭邦
Warszawie = Warsaw = 華沙
蕭邦係波蘭三大名人，其餘兩位係哥白尼同居禮夫人。
留言
張貼留言