202405 波蘭華沙歷史行： Day 1 華沙鐵路博物館

華沙機場面積唔大，好快就拎到行李，托賴無穿無爛，
正如上一個post提及，華沙機場都係係Zone 1，
去火車月台條路係有d崎嶇同要落地底。

我原本大安旨意可以用佢個APP買飛，
點知卡左係増值果到，用左HSBC同SCB幾張卡都唔得，
係佢個月台又搵極都搵唔到售票機。
眼見就黎開車，跳左上車先算。
點知原來車上都有售票機，仲簡單輕鬆地買左飛。

部售票幾易用，揀英文然後揀Zone 1 20min再拍Apple Pay就得，
我去到後期係波蘭文UI都識襟。

坐S2出市區，
我住華沙中央車站(Warszawa Centralna)同華沙西站(Warszawa Zachodnia)中間既Airbnb，
想搵d野食先同行下博物館。

部車幾乾淨，有overhead可以擺行李，
可能因為機場出車有車掌埋黎查飛。

波蘭文有d字同英文好似（似串錯左既英文），
同荷蘭文咁「你唔識荷蘭文但知佢係咁解」。

Airbnb最大既唔好處係無得寄存行李，
我個喼上機size黎但個碌拖磚地好響搞到好迷惑。

時間尚早，係車站附近搵左間cafe食個早餐hea下仲開左個會，
呢個trip天氣都非常好，藍天白雲又唔熱。

華沙鐵路博物館，其實個前身係Warszawa Główna站既駅舍、留置線同貨物站，
而家電氣化左唔需要咁多線路，於是拎左黎做博物館。
Warszawa Główna站而家新設左係博物館南邊大約50m。

Warszawa Główna既意思係Warsaw Main，中文我都唔知點譯，
留意返呢個同華沙中央車站(Warszawa Centralna)係唔同，
佢都係有始發同終著既列車，而目的地亦同中央車站既車唔同，
睇乘換案內果陣記得睇清楚。

入場費PLN 18 = HKD 36，對於係西歐郁d都10歐20歐既博物館入場費黎講係好抵睇。

第一個展區係模型同地圖、時刻表，海報等等既資料類展品，

我自己係好鍾意睇地圖因為由地圖可以圖像化去理解個變化，
而時刻表係另一樣歷史資料可以理解當時既技術水平。

我揀左d有趣既出黎分享下。

放暑假小朋友可以免費搭車

「孩子們可以在1934年7月8日至22日之間，免費乘坐二等或三等列車。
必須有一位監護人陪同，監護人可以免費攜帶四個孩子，
其他人需按照全票價購票。詳情請見P.K.P. 公告。」

PKP = Polskie Koleje Państwowe = 波蘭國鐵

1848年華沙-維也納鐵路計畫

呢張圖既重點係留意圖下方=.=.=.=.=既「波蘭王國邊界」，
西邊既係普魯士，南邊既奧地利，東邊既波蘭會議王國（俄屬波蘭），

係1795年第三次瓜分波蘭之後，地圖上係「毫無波蘭」。

1860年華沙-聖彼得堡鐵路計畫

「建設華沙-聖彼得堡鐵路主要是基於沙俄的政治和戰略需求。
主要目的是要與位於該線路附近的堡壘和要塞進行通信聯絡。
由於這些原因，這條路線直接由聖彼得堡通信管理局管轄。
關稅邊界的取消和有利的運輸條件的引入，
創造了從波蘭王國向俄國出口羊毛、棉織品和鋼鐵產品的有利條件。」

55聽到都覺得好開心，有直達車可以去聖彼得堡，

波蘭有d咩事仲可以用火車派兵添！聽到都覺得放心哂！

1939年二戰直前既時刻表
（1939年9月1日納粹德國入侵波蘭，是為二戰爆發）

支炮只可以向前 ／ 向後既大炮車，我諗極都諗唔明個用途，

向前打 ＝ 毀左自己條路，向後打 ＝ 毀左自己條退路。

去戶外展區，歐洲車我唔熟但蘇聯時代既機關車無論係電機定SL都係有「蘇聯味」。

行到差唔多中午，去拎鎖匙擺低野再去食晏，
Airbnb望出去，好chill勁好天。