201604 越南會安學潛水 Day 1: 第一日上堂

第二朝一早起身食個早餐先，
上次黎果陣麻麻地鍾意飲越南咖啡，d煉奶多到同咖啡1:1咁滯，
今次酒店早餐可以自己滴，平時我都係飲齋啡所以唔落煉奶，成件事正常返好多。

酒店後面係個池塘，朝早仲會見到有人割草wwwwwwwwwwwww

之後問左酒店去邊到換錢同買SIM卡(最終無買到，因為未開)就起行去潛水舖，
潛水舖係會安古城入面，佢除左係一間潛水舖之外仲係一間餐廳同酒吧，
有時夜晚D潛水教練會係到打Band wwwwwww

去到打左聲招呼佢就塞左一大疊野俾我填，
都係一D保屎忽既文件，話咩聲明無呢堆病痛，發生咩事都唔關PADI同間潛水中心既事etc etc

頭果半日係理論堂，睇一陣Video簡介下D裝備，(因為啊教練去左泳池set裝備)
教下你D基本潛水物理(水壓 / 浮力)同D安全方面既野(浮上黎既速度唔可以超過18m/min)，
其實，都幾悶，睇到我就黎訓著，衰在佢有問題要填，
不過好在個零鐘之後啊教練就返左黎，有人講係易入腦好多既。

做完哂D問答題就食個早飯，頭先提過果到潛水舖之外仲係一間餐廳同酒吧，
索性跟啊教練係果到食野，佢推介食呢個天使麵，唔錯D芝士同肉碎熔埋一齊，
但越南野都係偏細份，不過一陣落水就唔洗食太飽既，係果到食野仲有八折wwwwww

食完飯休息左一陣就搭教練既電單車車尾，
係，你無聽錯係電單車車尾，

去左個resort既泳池上第一堂，
個resort入面無影相不過exactly係呢張相入面個泳池，

雖然係個泳池但係佢D水係咸水黎，隔離就係沙灘。

去到就換左wet suit，教練講解下點set up套器材，

BCD (負責浮力控制果件Jacket)，

Regulator (個Valve，呼吸器，同氣壓錶)，

Tank (氣樽)，Weight Belt (鉛帶)，

跟著個順序做就其實唔難既。

之後落水開始試，會教你點樣控制浮力同緊急果陣要點做，

教練話成個PADI OW最難掌握既技巧係如果潛水鏡入左水果陣，

清返入面D水出黎，佢話呢個動作會搞到個鼻入水所以好多人都難掌握，

我又無咩野一次就搞掂。

基本野試左同練左幾次之後就收爐，

收返好哂D裝備同氣樽，

成個下就都浸左三個鐘，其實都幾凍。

因為我得一個人既關係潛水舖無嗌車黎接我，

教練幫我截左的士加埋100k VND做車費送我返酒店。

返到去沖個涼就出去搵野食，
去越南我好少係四四正正既餐廳食野，
大部份都係坐街邊檔，你睇佢架車仔就知佢賣咩，
同來來去去都係果幾樣，Pho係河粉，Com係飯，Ga係雞，Bo係牛，
字既變化唔大睇多幾次就知，同埋記得問下幾錢先坐低食。
越南野係偏向細份，我通常會食兩間再加個法包外賣，
我去旅行可以一日食十餐，返工可以食咖啡同曲奇餅當晏就。

物價黎講，胡志明市個物價貴D，
街邊一碗Pho要50k VND = 18 HKD ，連鎖店要100k VND = 35 HKD，法包一個要50k VND。

係會安既話，
街邊一碗Pho要30k VND = 11 HKD ，法包一個要20k VND = 7 HKD。

食Pho佢通常會跟一兜菜同香草類既野，檯面會有魚露，辣椒同青檸，
個人偏好滴D青檸汁落個湯到可以無咁油膩。
一路打一路流緊口水

Pho既配料間間都有唔同，呢間有牛之餘仲有魚同蛋，
我都係第一次食有蛋既Pho。

就係呢類型既檔仔，係街邊坐埋就有野食，
除左Pho同法包(剩係賣法包既檔仔通常唔會有得坐)，
仲有賣甜品(涼粉冰果類)，賣炸野(冬甩樣既同蝦餅)，
呢兩個都無試過，涼粉驚肚痛，炸野唔岩口味。

不過係越南食咁多餐都無試過肚痛。

食完一間到另一間，呢間係酒店附近，可以揀豬肉 / 牛肉，
岩岩食完牛就轉下口味食豬，有少少似煲完湯D豬肉咁既口感。

食完野休息左一陣就去左做Massage ，60分鐘Massage 都係350k VND，
近近地係酒店一個街口範圍內，回程順手買多個法包同啤酒，
咁多種越南啤酒中，Saigon係最正，Tiger麻麻地，
個人最鍾意都係Suntory Master Dream。