201612 日本九州歷史之旅: Day 2 九州鐵道紀念館 (Part 2 of 2)

資料館係舊九州鐵道會社既本社，設立於1891年，FYI 香港開埠係1841年，
九州第一條鐵路係博多至千歲川，開業於明治22年，即1889年，
明治24年門司至高瀨段開通，正式開始左九州既鐵道網建設。

我地成日講國鐵車國鐵車，其實係國鐵之前日本既鐵道生態已經轉換過幾次，
1907年既帝國鐵道廳，1908年既鐵道院，1920年先成立鐵道省，
1950年先成立國鐵(日本國有鐵路)，1987年鐵道民營化，就係今日既JR各社。

有台1:1既電車Go，打機識玩一定係咁玩。

我都玩左一舖，不過成績就....

樓上都幾多野睇，有哂全個九州鐵路發展既展品，
好多D舊時既時間表，書信，運行時間表可以睇，
呢個提一提先，佐賀城會有詳細既解說。

 大正十五年(1926年)既博多駅時間表，
留意下果陣既長崎係時刻表上寫"長寄"，
同埋上面有豉油廠既廣告。

下面呢張係明治21年(1888年)由政府出俾九州鐵道會社既鐵道建設許可，
果陣批准左既路線有門司港至八代(現鹿兒島本線)，
鳥梄經有田，大村，早岐至長崎(現長崎本線)，有田至佐世保(現佐世保線)，
小倉至行橋(現日豐本線)，宇土至三角(現三角線)。

另外，批果位係黑田清隆，第二任日本內閣總理大臣，
出身自薩摩(鹿兒島)。

車掌長好Q口

好鍾意呢D舊既行先指示

特急車前面既銘牌

 9600型蒸氣機關車用既速度計

蒸氣用既壓力錶

蒸氣機關車既車號銘牌

果陣時既駅長室，我發覺個間隔同設備同香港既差唔多(參考大埔個鐵路博物館)，
除左呢邊多左個火盆用黎取暖之外。

左面既紅綠旗係掛接果陣同運轉士協調倒車果陣用，
到今時今日既掛接都係用緊呢個方法。

係橫川果陣見個有個擺動計係用黎考試，量住掛接果陣既搖擺幅度。

呢部，係一部計算機，利申唔識用。

左邊果個係散子機，按一次個制會跌一個coin出黎，
而家仲有個現代版既，事務用品店有得賣。

右手邊果個係舊時硬式車飛既日期印。

呢個我都係第一次見，係俾保線員用既有線電話，
有線? 你玩我牙有線，其實係駁落去係供電桿上面既通訊線再打電話。