201612 日本九州歷史之旅: Day 4 青島神社，宮崎縣立青島亞熱帶植物園

一早起身食返個東橫Inn早餐，例牌既飯糰肉丸沙律腸仔味噌湯。

搭日南線向飫肥城進發，時間尚早去青島神社行下先。

國鐵Logo既風扇。

好鐘意呢類金黃色既田。

唔，個站名奇奇怪怪咁。

AOSHIMA，TAMIYA，FUJIMI = WATERLINE SERIES

係青島落車去青島神社行下。

架車個路線指示都仲係用緊人手去換。

好大風.... 青島上面有好多熱帶植物，有兩個學說去解釋呢個現象，
漂浮歸化植物說，種子/生木由南中國海，菲律賓同台灣經日本海流沖到青島，
殘存說，青島既熱帶植物係古代一路留存落黎，逐漸適應氣候生存落黎。

[唔係植物學家，資料係抄宣傳單張]

橋兩邊有個日南海岸既特殊地形，鬼の洗濯板，
由海岸沖刷形成泥岩同砂岩既交互堆積而成，
因為形狀似洗衫板所以叫"鬼の洗濯板"。

青島係古代成個島都被視為聖地，江戶時代次前一般人係唔俾進入青島，

除左農曆3月16到3月尾，一般人可以進入島內但外地人唔可以拜祭青島神社，

直到1737年先全面開放拜祭。

我發覺可能我樣衰，D貓唔係好鍾意我。

行完青島神社，隔離個公園仲有個亞熱帶植物園，
植物我識條鐵咩，都係當散步行下。

喂點解有條魚尾獅係到既，
原來佢同新加坡植物園係姊妹關係。