201805 拜訪仍在守護日本既二戰驅逐艦: Day 2 あじさいの湯

行完高塔山公園揸車去左 あじさいの湯，
一個位處於河內（唔係越南果個）既日歸溫泉，
係google map search 返黎，估唔到又幾高質。

Google Map 位置


溫泉有室內同戶外，有按摩池同冷水池，
一樓有大廣間，二樓係餐廳，
我有舖儲溫泉毛巾既癮，入浴料＋浴巾＋細毛巾一共1240円，
個溫泉算唔錯，戶外浸完可以坐係到吹乾下個人，
唯一美中不足係無綿簽無得撩耳仔。

我估除左我之外全部都係本地人，
而且大部份都係老人家同老豆帶住小朋友，整體非常唔錯。

有停車場，亦有接駁巴士可以來回八幡站。

一入門口就除鞋放Locker，
身為一個鐵膠，對數字係有一定既要求。

浸完一定係要飲牛奶，個身暖笠笠再飲杯凍野真係好正，
唔知點解係香港飲北海道奶都會肚痛，但係日本飲鮮奶都無事。

究竟係邊個白痴諗到係無著鞋既地板裝呢D盲人釘，
第一次行落去無留意踩左落去以為踩中石春路。

牙痕嗌左個會席set，連埋啤酒（無酒精）埋單1800円。

個景真係一流，個環境舒服真係食啖飯都好食D。

食完飯係大廣間吹住山風訓下覺睇下雜誌，這就是人生.jpg

過期雜誌真係好正，100円可以歎一個下午。