202602 去左杜拜玩貓兼工幹： Day 0 HKG -> DXB CX731
已經有一段時間無去過杜拜本社，對上一次已經差唔多已經係兩年前，
呢段時間一直係亞洲周圍跑，
老細話見就黎過年手頭工作鬆少少，又撞岩有公司活動就去本社行下。
由香港去杜拜大部份人都會諗起EK，
想當年on-boarding第一次去杜拜果陣都係坐EK，
極討厭坐呢間航空公司，主要係周圍d人既問題，
又嘈又盛果8個鐘機都可以又杯麵又呢樣果樣。
自從CX開左HKG-DXB之後都一直係搭CX，
以前個時間係好差，land 果陣已經係杜拜半夜兩點，到公司宿舍已經係凌晨三點，
而家個時間好左，夜晚十點鐘到，十一點半咁上下就到宿舍。
杜拜係UTC+4，對東京係5個鐘時差，對香港係4個鐘，
岩岩好係半日即係你好難好似去左EU果陣咁同人講你放工 ＝ 我返工然後miss哂d會，
調整時差係極為難搞，我習慣係完全唔調整，直接用返亞洲時區生活。
每日朝早三四點起身做野，七點出門口去公司樓下食早餐（宿舍隔離棟樓就係公司），
八點打卡，重要既會盡量朝早開完，
下午開始半發吽哣mode，開d同HR / Operation catch up既會，
下午五點鬆人食晚飯，夜晚八點就訓。
12月至2月係杜拜既「冬天」，夜晚入夜可以去到13度，我第一晚凍醒左。
中午有太陽係戶外可以去到25度，體感都係舒服但有沙塵。
香港去杜拜如果係用BNO要預早申請簽證，HKSAR就唔洗，
杜拜／UAE既貨幣係AED，1 AED ~= 2.2 HKD，
基本都係全部用卡，暫時無咩地方見到係cash only。
每次去杜拜其中一個我好期待既事情就係公司樓下有好多流浪貓，
同大部份貓都係好痴人，佢地係公園d花圃有人造左d屋仔同定時有人餵，
我今次去都買左隻Daiso鼠同零食過去。
「杜拜」同「阿布札比」都係阿拉伯聯合酋長國UAE最出名既兩個地方，
「阿布札比（國）」面積最大，阿布札比（市）係首都，
「杜拜（國）」面積第二，最大既城市係杜拜（市）。
係咪好混亂呢～
今次都係經香港轉機，早一日CX521返左香港屋企訓左一晚，
第二日朝返左香港office收下信睇下有無俾人爆格就入左機場hea。
星期六中午有個call，過完關去左The Deck搵個角落入call，
我本身係The Pier fans好少去The Deck，
以前飛JL26果陣就鍾意去The Deck因為近閘口唔洗行餐死。
因為The Wing裝修緊，The Deck而家變左First Lounge，
有a la carte menu 但始終都係Business Lounge底，服務同野食都唔係精緻。
作為參考同樣Chinese set，The Pier First既presentation同選擇都多好多，
我尤其欣賞個辣椒醬，好夾食腸粉同炒麵，有胃口果陣整個擔擔麵倒埋落去真係一流。
但竟然發現左d新野，竟然有Besty仕樣既飛機杯（意味深），
勁想要幾個擺係屋企，但睇左因航網上商店同Gate 61間因航手信舖都無，
希望快d擺上去賣，最好有一箱4個／6個既set。
開完個call搭電車去The Pier食個午餐，
唔太想食Burger都係食個卅二公館 Tasting Menu，
話說好似都有一段時間無轉過，印象中都食過幾次。
小食既豆腐配餐前既cocktail，
個base係凍檸茶加左少少少少Tequila，個配搭幾過癮。
前菜川式口水雞其實雞肉係比較鞋，主菜既炸鱈魚係幾岩送下啤酒。
食完正餐食少少芝士幫助消化，我自己會配port wine，
甜口好岩當餐後酒，配d芝士同果乾休息下。
飲飽食醉，去沖個涼再搵個地方訓兩個鐘等上機，記得要set鬧鐘。
飛DXB大部份情況都係用77W，本身因航都有好多貨機飛去DXB / DWC*1，
佢d機底貨都夠搵食，同入座率比想像中高，好多菲律賓／中國轉機人去杜拜做外勞。
*1 DWC係杜拜第二個機場，主要係貨運。
39K Econ第一行，出入都方便d，仲可以J下隻GE90，
唔係我手震，係架機真係咁污糟。
係Lounge食飽左對個飛機餐僅限於試味。
Off topic 搵到個勁搞野既地方名，可能係葡萄牙人命名既。
落機果陣已經係亞洲時間凌晨三四點，
懵口懵面搭小火車去過關同拎行李。
搵Uber條隧好似的士站咁上車就係，
唔塞車果陣公司離機場大約30分鐘車程，杜拜差唔多係成個城市由零開始開發出黎，
好似玩緊無限金錢既City Skyline咁，一條主幹道加一條鐵路，
兩邊全部都係商業區同酒店商場。
條主幹道係六車線（單程，來回12）但返工放工時間都係會由某d出口倒灌塞返出黎，
所以走果陣我係五點鐘嗌定車即走，
試過有次拖到六點我塞左個半鐘有多先到機場。
係長櫈食緊朱古力條果陣有隻三毛貓跳左上黎一齊坐。
貓本身係起源於中東，比較習慣熱既氣候，
呢個時間既夜晚對於佢地黎講係有d凍。
無論去貓cafe定前幾次黎杜拜都係d みけねこ食完我d糧就唔理我。
不過據朋友所講，係貓既眼中三毛貓係最靚既毛色，
絕大部份既三毛貓都係雌性，平時都係好食好住。
相對橙貓／黃貓（茶トラ）大部份都係雄性。
佢係黑色底上面有橙毛，整體個感覺對於人類審美黎講就係唔太welcome。
貓一日用三成至一半時間舔毛同清潔自己。
所以如果你見到隻貓係污糟既，佢已經係衰弱到連清潔自己都做唔到。
我平時成日去有間曼谷既貓cafe，隻死野只要佢訓醒左就會周圍搞其他貓，
連緬因貓咁大隻佢都照拍人地個頭。
留言
張貼留言