202602 去左杜拜玩貓兼工幹： Day 1 休日

琴晚同隻みけねこ玩左陣就返宿舍沖涼訓覺，
但訓訓下覺得有d寒，醒左一睇得13度。

Hea左陣做左陣野，落樓搵早餐食，
我以為係我休息唔夠對焦唔到，再睇真d係玩緊Sky Dive，
都幾癲下係市區又大風又多高樓。

個人凍凍地（以為作感冒），我都唔知原來杜拜會凍，
八點半都係14度，落街要著冷衫。

自從上年去完柏林又睇左下蘇聯時期既飲食文化，

愛上左食俄國菜，或者嚴格黎講係「蘇聯菜」。

點解杜拜會有咁多俄佬，本身杜拜個人係入息免稅，
只有入口稅同消費稅，自從俄羅斯入侵烏克蘭之後，
為左逃避兵役好多俄佬走左去杜拜，泰國，越南同印尼。

Even 最近既美烏俄三方會談都係係阿布扎比舉行。

好多耳熟能詳既菜式都唔係「俄國」自己既菜式黎，
正如斯大林係一個格魯吉亞人，
引入現代化食品工業既米高揚係亞美尼亞人（米格個米高揚既啊哥）。

綜觀蘇聯歷史，一開始蘇聯係唔想家庭自己去煮飯，
應該去公共食堂食飯，咁當然事實上係唔太成功，
於是蘇聯政府編制左一本「官方」菜譜，
美其名為「美味與健康食品之書 КНИГА О ВКУСНОЙ И ЗДОРОВОЙ ПИЩЕ」。
教你點樣煮出一道合格既「蘇聯菜」。

網上有1952年*1版本，當年既彩色印刷非常精美。

url: https://stockmagia.ru/wp-content/uploads/2020/11/Kniga-O-Vkusnoj-I-Zdorovoj-Pishche-1952-Pishchepromizdat.pdf

一打開仲有斯大林同志既講話（左頁）

「我們革命的顯著特點在於，它不僅給人民帶來了自由，
還帶來了物質上的福利，並提供了過上富裕和文化生活的可能性。」

—— 斯大林

*1 斯大林係1953年去世

前言（右頁，略）

《美味與健康食品之書》的主要任務在於幫助家庭主婦以最少的勞力和時間，
為家人準備美味又健康的食物。
為此，首先要利用食品工業生產的多樣化和豐富的食品種類。

書中介紹了合理飲食的基本原則，簡要說明了各種食品的知識，
並附有經驗豐富廚師編寫的各種菜餚食譜。

豐富既肉類，水果，當然唔少得有酒。

本身格魯吉亞同亞美尼亞都有悠久既葡萄酒文化，
甚至被視為葡萄酒既發源地。
冰桶仲有支蘇聯香檳。

米高揚引入外國技術，建立現代化既食品工廠同漁業，
到赫魯曉夫時代既粟米，食譜上亦都有因應物資供應而衍生出黎既菜式。

例如係新鮮肉類難以保存同運輸既年代，

米高揚大力支持建立香腸工廠，提供更廉價肉類選擇，
蘇聯人亦直接將香腸替代菜式中既肉類，創造出蘇聯風格既料理，
其中一個代表作就係Solyanka Солянка。

Solyanka係起源於烏克蘭，用醃黃瓜汁同高湯做基底，
加入肉類（火腿／香腸）、橄欖、西餐三寶（洋蔥，紅蘿蔔，西芹）同蔬菜煮成，
飲既時候加酸奶油同食個俄式麵包хлеб，凍凍地係幾唔錯。

係「美味與健康食品之書」入面既描述係咁，

索揚卡肉湯

將去皮的捲心菜切絲，放入鍋中，

加入一湯匙奶油、半杯水或肉湯，加蓋用小火燉40分鐘。

然後加入炒洋蔥、蕃茄醬、醋、糖、鹽、月桂葉和胡椒，

繼續燉至熟，大約10分鐘。當捲心菜煮好後，加入用奶油炒熱的麵粉，攪拌均勻並稍微加熱。

同時，將肉類食材（如熟肉、香腸、火腿、燻肉、牛舌等）切片，

稍微與洋蔥炒熱，加入切片酸黃瓜和刺山柑，再加入2～3湯匙肉湯，加蓋煮幾分鐘即可。

官方教學都係用香腸／火腿作為肉類來源。

食食下野有隻黃貓行埋黎，你見佢毛色唔錯幾靚仔，
平時應該好食好住，食完野行去公園拎左隻Daiso鼠同佢玩。

周圍去逗下貓。

同貓玩左陣，決定返去訓晏覺，
突然好牙痕，係樓下超級市場買左幾個Indomie返去煮，
食完就岩岩好想訓，真係極邪惡。

訓醒差唔多太陽落山，繼續去逗下貓。

呢隻朦豬眼貓。

邊到搵到D咁主動既貓。

夜晚搵左間拉丁美州菜食，半邊雞一個飯一個沙律幾條菜咁，

隻雞用炭烤幾入味，唔肯定南美係咪真係食Basmati米但幾香。

食食下飯，聽到有d喵喵聲，
有隻白黒貓行左過黎趴左係到想拎野食，
呢邊好少見貓咁瘦，但我出黎果陣無帶野食，
食緊既野又好重調味佢唔食得。

見拎野食不果，印左個貓腳印俾我就走左。

我行左返宿舍拎貓糧，兜左一輪都唔見佢，
係長櫈見返琴日隻三毛貓。