201512 關西淺度遊 Day 1: 難波八幡神社

我係南海買左張轉乘票，可以係天下茶屋搭去京都，
但其實係中左伏因為我只係去到長岡京，唔去京都市內，
我反而應該買南海+地鐵一天劵先岩，
耐無搭大阪既私鐵有D生疏，搭慣はるか+環狀線+東海道本線新快速+山陽本線新快速。

對上一次搭南海應該係幾年前第一次去關西，果陣係機場搭落和歌山。
係日本搭鐵路，識搭一定係企車頭睇訊號燈同運轉士指差確認，
然後發覺佢超速俾人綠黃燈 / 黃燈 / 紅燈果陣指住佢黎笑

個人覺得日本鐵路比香港優秀既原因係佢有特急 / 快速既車可以揀，
唔評論太多我知一定有世界大戰，
但你要教識班愚蠢既香港人睇明個邊班車停邊個站我相信要唔少功夫，
你見上水去羅湖 / 落馬洲有人坐錯車。

雖然張飛係到天下茶屋，但我要轉車去尼崎所以直接搭到去難波，要補150，蠢之一。
難波係南海既大站，好耐無掂過火車影返夠本。

搭阪神去尼崎來回盛惠660，蠢之二。

咁早去到尼崎凍冰冰搵個早餐食下先，

明明四個鐘前先食完野，

行過搵左間café食個早餐先，

同樣都係多士同咖啡，我係日本食咁多次最好食都係係新今宮Hotel Toyo街口果間，

排第二就高山市バグパイプ，即係冰果實景果間。

由車站行左十五分鐘到左此行既目的地，難波八幡神社，

點解要黎呢到係因為呢到供奉左榛名唯一既遺物，

一支刻有國光宣揚既旗桿。

1935年既榛名，紅框就係旗桿既位置，

圖片引用自維基百科榛名號戰艦

或者趁呢個機會講下榛名既故事，

金剛型既設計其實源於英國人，一番艦金剛就係係英國建造完再去日本，

二番艦比叡，三番艦榛名，四番艦霧島就係日本本土建造，

榛名同霧島仲係第一次由民間船廠建造，亦證明左當時日本民間船廠既技術水平，

其實去到二戰既時候金剛型已經服役二十幾年，榛名一直係前線戰鬥，直到吳軍港空襲，

係戰後同幸運空母瑞鶴，不會沉的驅逐艦雪風被評為武勳艦。

____旅館 / _____御殿: 前線，不認識的孩子呢。

好諷刺，”戰力最強”既大和型同長門型一直都係母港待機，

反而係前線最活躍既係舊式戰艦。

水雷戰隊既情況一樣，

伴隨各位大小姐係母港待機既一水戰，

同一直係前線同敵人廝殺既二水戰，

二水戰係第二個痴線既故事，都係講返榛名。

大家可能留意到，點解金剛型既命名係用山岳名而唔係用國名去命名，

唔同扶桑型，伊勢型同大和型，金剛型既分類最初係巡洋戰艦，所以同重巡一樣係用山岳名黎命名，

一番艦金剛艦名源自大阪府金剛山，

二番艦比叡艦名源自京都府比叡山，

三番艦榛名艦名源自群馬縣榛名山，

四番艦霧島艦名源自鹿兒島縣霧島山。

榛名最出名既作戰應該係同大傻金剛一齊炮擊亨特森機場。

當時收到陸軍既支援請求後係特魯克港出發，

1942年10月14日凌晨，金剛同榛名先利用三式彈同零式彈炮擊機場跑道，

再掉頭用徹甲彈炮擊，發射所有炮彈之後返回特魯克，

呢次襲擊摧毀油庫同41架飛機，表面上戰績優良，

但山本五十六犯左兩個戰略性既失誤，一係佢睇小左美軍工兵既修復能力，

二係其實果到仲有另一條跑道，

所以第二日既登陸部隊被美軍飛機屠殺。

山本提督: 陸軍既野關我鬼事咩 

榛名既最後作戰係吳軍港空襲，當時日本已經缺乏出擊用既燃油，

大部分軍艦都係泊係港入面做浮動炮台，

包括伊勢，日向，天城，葛城，龍鳳，鳳翔，青葉，利根，北上，大淀，

榛名利用三式彈抵抗，撃落兩架B24轟炸機，

但遭受二十發炸彈後榛名入水坐沉，作為戰艦既一生正式畫上句號。

你可能覺得，頂呢條友係咪痴線既，特登飛過黎睇條爛木，
中文唔好唔知點解釋俾你聽，你可以當我係痴線既，我無所謂wwwww