201609 關東一百名城之旅 Day 2 : 箕輪城，鉢形城

一早起身食完個早餐就去攞車，準備今日攻略埋箕輪城同鉢形城。

攞車果陣佢有張圖同你一齊對下個車身有咩位置係花左既，
返黎還車果陣就唔會有爭拗。

架車唔錯，除左係有D煙味，
架車就無以前架Estima 咁闊落，不過一個人就是但啦。

箕輪城係高崎出發大約三十分鐘車程，
(因為去程果陣行都一半落大雨，揸唔得太快)
就黎揸到榛名山既山腳位置。

呢期揸車去過幾個城，發覺好多都有一大個停車場免費任你泊。

話明係城跡，你去到可能真係得一片草地然後話你聽果到係城址，
不過做得城撚就係為左去感受下歷史既舞台，有無個天守係到並唔重要。

講下箕輪城，頭先提過箕輪城位於榛名山山腳，
築城果陣利用左周圍既環境，西邊既水堀利用左榛名白川既水路，
南邊既水堀利用左榛名沼既水路，慳返唔少工夫。

箕輪城係短短八十六年既歷史入面幾乎不停易手，
由築城既箕輪長野氏，到俾武田氏總攻落城，
到後來織田攻略甲州，武田滅亡，箕輪城由織田接管(1582年2月)，
但好不幸地係同年六月，本能寺之變，織田氏大勢已去，
北条乘機攻略上野國(古代制令國)，滝川一益係神流川之戰寡不敵眾大敗，
箕輪城由北条氏接管，其後豐臣秀吉係小田原征伐大敗北条氏，
同年(1590年)，德川家康入主關東，將箕輪城封俾最後一任城主井伊直政，
八年後，井伊直政改封高崎城，伴隨住城主離開，箕輪城亦都隨之廢城。

我行極都搵唔到一百名城個印係邊，原來放左係附近既市役所，
因為落好大雨所以無影到相。

蓋完印上返車向鉢形城出發，鉢形城其實已經離開左群馬縣，
去到崎玉縣秩父附近，沿國道揸左一個鐘咁上下，
國道個車速唔高，因為好多燈位同幾多大貨車，
二來我一見Lawson就揸入去睇下有無folder，
啊頂佢一個秋月照月初月既都搵唔到，剩係得一轟轟既長十炮。

鉢形城都係一個城跡，但有部份既遺址修復左，起左個資料館。

好鬼熱，直頭係曬到個頭好痛。

回程果陣係Lawson泊低買杯咖啡，我發覺日本人揸車都幾守規，
過綠燈係見到黃燈就收油，停定等轉紅燈，
但佢地由紅燈轉綠燈中間無黃燈，所以係要睇人行果盞燈。

不過我可能係全群馬縣最慢既人，係條車速限制40既路俾人推，
呢到個個都中學就夜媽媽送豆腐㗎?

還車前入返滿油，117 JPY/L 換算返大約係 HKD8.8/L，
仲平過係澳門入油(~$9.X/L) / 香港 (~$12.X/L)。