202606 德國漢堡睇博物館: Day 1 漢堡海事博物館 International Maritime Museum Hamburg Part 1

係酒店放低行李就去搵個早餐食，時間仲係好早九點都未夠。
Berliner Tor 係個好方便既站，有S Bahn有U2 U3 U4基本上包哂市區要搭既線，
再唔係就搭一個站去Hauptbahnhof就真係所有線都齊哂。

又係呢個英文人好易會搞錯既not系列，成日會load左做「唔係」，
Ausgang = 出口，Notausgang = 緊急出口，
Ruf = Call，Notruf = Emergency Call。

呢個係舊design，新design既牌轉哂做SOS。

估唔到既係漢堡既鐵路同巴士係星期六日同祝日既前一晚開始會行通宵，
柏林既公共交通係假期會成九點十點先有頭班車。
呢張時刻表有個好得意既地方，平時既星期一至日係
Montag / Dienstag / Mittwoch / Donnerstag / Freitag / Samstag / Sonntag + Feiertag

[From朋友]
Sonnabend係東部同北部先用既「星期六」，意思係「星期日前一日」
Sunday = Sonntag 既Sonne = 太陽
Abend = 傍晚

Chatgpt 補充話係因為日耳曼人係用日落開始計為之一日，
星期日既前一日＝星期五日落到星期六日落。
係德國其他地方或者官方文件會用返標準Samstag。

Freitag = 星期五
Feiertag = 祝日，Feiern = 慶祝 + Tag = 慶祝既日子 i.e. 放假，又係同日文既「祝日」好似。

個站牌好認真咁寫Minute(單數)同Minuten(眾數)

漢堡海事博物館位於Überseequartier，字面直譯就係「海外區」，
以前係漢堡既倉庫同碼頭區。
d街名又係好騎呢，又大阪街(Osakaallee)又海外街(Überseeallee)，
又New Orleans Straße又San Francisco Straße。

個黑白色既地板好似廁所w

係月台擺隻船鎮下宅，後尾先知好多船模係附近d船廠同船公司捐出黎擺博物館，
有d 1：100 1：50既五米長巨型船模。

天氣幾好，一出站見到有架Food Truck賣CurryWurst先醒起漢堡應該係屬於柏林果邊，
一於早餐食個CurryWurst整多支Apfelschorle。

點知係唔太好食，呢次係漢堡我食左幾次CurryWurst都麻麻地，
始終係柏林街邊檔好食d，我再望真d架車寫Since 2022，日本果d「創業令和4年」。

漢堡／德國北部好多紅磚建築，因為無中南部咁多石材資源，
沿海邊搵到優質黏土整成紅磚仲平過係內陸運石出黎。
博物館個建築本身都係一個好標準既商行設計，
通常地面層樓有大門，樓底高作為出入貨通道同寫字樓，
上層會放谷物類散貨，一包／一桶用吊車吊入大樓入面儲存，
外面綠色既打直既大門就係每個樓層既出入貨口，
上面突出黎既支撐會有個滑輪，直接將貨吊上去樓層。

門既入面。

用Hamburg Card買博物館飛可以平幾蚊，
我買左5日連AB區火車飛，盛惠EUR54.9。
話說Berlin果個叫Berlin WelcomeCard，
我成日好順口咁叫左做Hamburg WelcomeCard。

EU既博物館有個好處係有cloakroom可以擺低野同d衫，
唔好既地方係通常都要1 EUR硬幣，EUR銀仔放哂係日本屋企無係身，
唯有問reception換幾個銀，而家有d先進左係會有一個dummy既膠幣係入面。

個博物館睇落唔大，但認真睇足足由十點佢開館一路行到五點幾佢收館先走，
中途剩係落左樓下cafe 食左個飯。
你想像到同船有關既野佢都有講，由技術，歷史，運用，到今時今日既船係咩樣都有，
仲有兩三層船模收藏，展品勁豐富。

繩結已經忘記左九成。

導航由最初觀星去辨別方向，去到利用推算航法*判船既現在位置，
到後黎指南針經阿拉伯地區傳入地中海，再有六分儀同八分儀既引入，
直到而家有GPS，技術係不停咁更新。

推算航法係利用出港時既座標，
一路記錄船既方向，速度同時間就可以推算出而家既位置。
係未有GPS既時代，例如零戰既機師，都係靠呢個方法去判斷方位。
到而家既飛機上面都仲有利用推算航法引申出黎既系統INS，

用加速度計、陀螺儀同先前既位置推算，但誤差會累積，
一收到GPS果陣就會自動修正。
INS既起始座標係出發前check list 上面其一個事項，
會自動較正GPS或者手動輸入座標，
所以停機坪有陣時係Gate Number 下低會有一個好準確既GPS讀數俾機師參考，
睇機場Chart亦都會有。

用六分儀度左角度，仲要靠航海曆同天文鐘，
航海曆係一本字典咁厚既書記錄左唔同天體係一年入面唔同日子時間既角度，
加埋天文鐘俾一個UTC時間（果陣係GMT）就可以計數去搵到而家既位置。

複雜既天文鐘好容易受波浪影響出現誤差甚至損壞，
工程師設計左一個機械裝置去對抗船上面既搖擺，
同樣既結構到今時今日既機械羅盤都仲用緊。

有個六分儀既模型教你點樣開鏡去睇同計數。

航海曆

Större Fixstjerners Middelsteder den 1. Januar 1856. <- 丹麥文
1856 年 1 月 1 日主要恆星的平均位置

因為總唔可能每年去買一本新既航海曆，
通常會每十年做一個基準然後透過offset去推算而家既數據。

古時一出左海基本上無方法接收到新資訊，

一直要到電話同無線電既出現先有方法係陸地同船上面既人溝通。

而係船對船或者船就到港口果陣，除左派架小艇落去搵人傳話之外，
仲可以靠船旗或者手旗信號，或者用燈號打摩斯密碼，
同樣標準一直留存到現代，亦係每個學員必學既課程。

講起信號旗，每支旗係代表一個英文字母之外仲代表一個信息，

A - Alfa係有潛水員在水下，要求其他船慢駛同離開，

O - Oscar係man over board有人跌左落水，要求其他船慢駛同注意求援，

全黃色既Q - Quebec就係要求檢疫，係泊港之後如果貨物中有生物* 就需要掛出黎，
等港口檢疫上船檢查完，簽齊文件先可以俾港口既人上船同上落貨。

* 有個船種叫牲畜船Livestock Carrier，可以將d牛羊活生生咁放上船運去第二個國家，
係澳洲同新西蘭去印尼同中東既航線經常會見到，
主要係穆斯林國家既Halal需求，同穆斯林有d節日係要屠宰牛羊拜神，
所以唔係出口凍肉而係出口活生生既動物。

順帶一提，隔離既英文Quarantine既語源Quaranta giorni，意大利文既「四十日」，
就係講緊14 世紀黑死病流行期間，
由疫區到達既貨船要係外港停留40日證明無傳染病先可以入港。

東鄉長官既Z (Zulu)旗，講起日本既手旗信號係日本自創，
用一紅一白旗同イロハ順序去傳片假名，摩斯密碼都有和式摩斯版本。

另一樣講船旗好有趣既展品，
當時資訊唔發達即使係船長都未必識得到哂所有國旗，
呢個時候就要靠圖鑑去分辨對方國家同身份，
我都係靠Chatgpt去幫手認。

第二排最左兩支106 107係「教皇國」，梵蒂岡既前身，統治一部份既意大利半島中部。
106係教皇在位既時間用，107係教皇過世，新教宗未選出既時候用。

第三排中間128 129係瑞典—挪威旗，128係商船129係官方/軍隊，
當時兩個國家都加入左「反法拉利同盟」成為左一個聯合王國。

第三排最右131同第四排第三個都係里加既旗，而家拉脫維亞既首都，
當時係北海一個好重要既港口，出口俄國皮草去其他國家。

第四排第三個149 Revel就係而家既塔林Tallinn，而家愛沙尼亞既首都。

RPG，講錯，測距儀黎。
係目視時代望遠鏡既船員必備既工具。

上面提過既信號旗，其中一個好重要既信息係同領港服務有關，
例如：G- Golf 係要求提供領港，H - Hotel 係領港在船上。
領港係指外國船隻到左本地港口，因為每個港口既海流同水底狀況都唔同，
要靠當地既領港員，俗稱帶水，去指示船隻泊岸。
領港員靠一隻好細隻既引港船用爬梯上船，風浪大果陣非常危險，
你想像棟IFC放平左係浪上面浮下浮下，靠浪頭果下跳果去捉住條繩梯先上到船，
跌落水都還好，通常艙口有幾個船員拎齊勾桿準備，
最怕係後面隻引港船俾浪一下撞你埋去架大船船身到。
領港員通常係好資深既遠洋船長退左唔做船公司先去做，
係船上好受尊重，出入港基本係佢全程負責控制，船長都係聽佢支笛。
上到船會有船員帶佢上艦橋，通常標準係要包佢一餐飯。

展品係貨船Aurora係1895年兩張出港入港既領港服務收費，
領港員既收費係按船噸位計算，有d港口係強制引港例如Aurora進入既利物浦港，
引水艇亦另外收費，遇到惡劣天氣或突發情況，
領港員要留係船上面既話亦另外收費。

兩張收據都貼左1便士印花稅票，
同今時今日既印花稅英文Stamp Duty個模式真係一個Stamp黎，

除左係印花稅票仲可以當郵票用，貼左上文件再簽名或者蓋章先叫完成。
而家既日本都仲保留住呢個制度，去政府交文件係無繳費處，
佢會叫你去買「收入印紙」再貼係文件上面。
普通Invoice過左一定數額都要交印花稅。

航海其中一個好重要既工具就係海圖，詳細既經緯度，岸邊既水深，
港口，港口既設備(E.g. 乾船塢，上落貨工具)，河口同河道既水深，
都係對航行好重要既工具。

地圖由一開始既宗教取向描寫到實用化既地圖係一個好大既轉變，

因為最初既書/圖既複制技術都係靠手抄，而知識係大部份掌握係宗教機構，
教士其中一個工作就係每日手抄聖經~~新約！加舊約！一次！~~，

亦代表要點樣去「表達」、「陳述」一件事既主導權掌握左係一班唔客觀既人身上。

直到印刷術既出現，知識先有機會大規模傳播。

中世紀既地圖，唔係用黎導航而係去表達「世界觀」，別名叫T型地圖，
外圍紅線係「無盡既海洋」，中間綠色係海，
左係歐洲、亞洲同非洲，右邊係「未知地域」，
中間書頁既分隔線係指灼熱帶 i.e. 赤道。

當時既歐洲航行，如果要去印度洋，要係非洲西海岸南下，
中途會經過最近世界盃好hit既佛得角，我一直都係叫開葡文意譯既「綠角」，
穿過赤道，繞過南非好望角，再沿非洲東海岸北上。
以中世紀既航海技術基本上係無可能完成，尤其係非洲海岸無大型既港口同城市，
連補給糧食同淡水都有問題，赤道既酷熱天氣亦對歐洲人黎講好痛苦，
所以先會描述為「灼熱帶」，當左係地獄既另一邊。

下一代既地圖已經有唔少進步，基本上已經準確描述各大洲既位置。

再去到近代化既制圖，未有電腦plotter之前係用人手鑿銅板去做個印模再印，

一個模隨時要一年時間先造到出黎。

銅板上面既地圖亦好有意思，係基爾運河既航行圖，
連接基爾同易北河河口，航線可以直接繞過日德蘭半島，
最初係叫威廉皇帝運河Kaiser-Wilhelm-Kanal，紀念普魯士國王威廉二世主持開幕儀式，
而家叫北海-波羅的海運河Nord-Ostsee-Kanal，
Ostsee中文叫波羅的海但德文直譯係Ost東 + See海。