202606 德國漢堡睇博物館: 簡介

上個Trip返黎由三月係日本一直踩趕Project趕到個人就發癲，
連續幾個星期係個客到訓埋，朝早六時一醒就去開工做到夜晚11點先返房訓，
做到連每年一定要去EU既生日trip今年都斷左纜。
好在都叫係GW期間交左貨，拎左兩個禮拜假去曼谷休息玩下貓，
再返左office一星期，見手頭唔係好忙就索性再拎兩個禮拜假去EU行下。

本身係想去波蘭南部，但搵極d飛都唔係好岩，一係就要經中東最憎，
睇睇下Google Map不如就去德國，反正北部我未去過，
漢堡周邊亦有幾個博物館係Bookmark左好耐想去既。
咁岩俾我搵到張好奇怪既AY PEY係經上海飛HEL而回程係經BKK，
兩程駁腳都係CX，無咩大懸念就篤左張飛過去漢堡。

行程去左幾個城市，主要係漢堡，不來梅Bremen，基爾Kiel，呂貝克Lübeck，
交通都係靠DB，今次試坐左短途既ICE仲係餐車飲下液體麵包係幾Chill。

上次係啤酒節個post有個巴打話唔好四月／冬天去漢堡，
的確上年12月果陣一個人去左柏林，每日都天陰陰又無太陽又大風仲要4點就落山。
今次六月中去漢堡，一落機果幾日係10至15度，未去到要著大褸但好大風，
之後開始落雨，一落就黃雨咁上下程度，我都無諗過係EU體驗到濕凍同橫風橫雨。
有一日係朝早四點幾開始行雷閃電，閃到我醒左起身睇手機，
Twitter講到世界末日咁而的確係大雨到DB都停埋。

Wait DB出「Fahrt fällt aus」應該唔一定關天氣事。

而更離奇既係，落完雨之後，氣溫升左上三十度有熱浪薯片我燒粟米咁橋添，
德國大部份既屋都係無冷氣，得d商場同酒店入面有，
Even我酒店房入面個FCU都係極細cooling power，開足一晚都唔凍果d，
更更更更離奇既係，地鐵U-Bahn ／ 市內火車S-Bahn都係無冷氣（某幾條新線有），
係戶外曬熱左既車廂只係靠果個細細個既氣窗通風，
我見有司機係開住門揸車，唔係中暑都似，
最後果日直頭係熱到我有d頭痛，要不停搵野凍飲液體麵包降溫。

An alle, die sich fragen, warum es so heiß ist.
Das ist der Sommer vom letzten Jahr.
Er kam mit der deutschen Bahn.

致所有正在疑惑為什麼這麼熱的人：
這是去年的夏天。
它是搭德國鐵路（DB）來的。

我本身係好鍾意睇船同船既博物館，
有個Uncle係做遠洋船，細個有諗過去讀航海學校去行船，
覺得可以周圍去旅行見識下個世界，又可以離開屋企，
但個Uncle同我講一樣好現實既野就係做Engineer升到頂都係大副Chief，
唔會有機會行到去船頭個位，同船上面大部份都係機器佬野，唔太岩我既專長。

我最初接觸「漢堡」呢個地方係係一隻好舊既PC game叫「大航海時代4」，唔知有無巴打玩過。

細個果陣係未有「威力加強版」，得4個主角可以揀，我通常都係用葡萄牙佬（中間果個）。右邊綠色衫個妹仔係荷蘭商會，經營阿姆斯特丹同布魯日既航線，
布魯日對於果陣時既我係一個好陌生既地方，
睇新聞講盧荷比既大城市講得出名既阿姆斯特丹，海牙，鹿特丹，布魯塞爾，安特衛普都好少會提到布魯日，
今次去左呂貝克一個講「漢薩同盟」歴史既博物館，收獲好豐富，
遊戲入面既城市同地標都幾有考究，寫到去可以詳細講下。

Between 我係成功「爆機」，全地圖探索同金錢99999999。

唔多廢話，下個post入正題。

德國旅行資訊可以睇以下url

202510 作為酒鬼一生人要去一次既慕尼黑啤酒節：簡介

https://miraigajettokenkyujo.blogspot.com/2025/09/202510.html