201701 在關島尋找二戰足跡: Day 6 Yigo 地區

去到第六日終於出發去行下關島既二戰遺跡，
係二戰期間關島經歷過兩次主要戰役，
分別係1941年日本對關島既攻擊(あ号作戦既其中一部分)同1944年美軍奪還關島。
順帶一提，攻佔香港都係あ号作戦既其中一部分。

關島由二戰開始已經係一個戰略要衝，佔領關島除左因為佢係美國領土之外，
主要原因係關島起飛既轟炸機可以直接攻擊日本本土，
而1944年美軍重奪關島之後，B29轟炸機就係係關島出發去空襲日本本土。

租車公司係酒店附近，照舊係cafe食個早餐先，
第一次揸泡菜仔車(Hyundai)加上係左軚，唔多唔少有D緊張，
成日驚出路口行錯對頭線。

關島D路麻麻地好揸，可能習慣左係日本好順既駕駛體驗，
一路行好似行緊龍翔道咁，亦比我想像中多車，夜晚放工時間直頭會塞車。

原定係去關島最北既海灘Ritidian Point行下，
但因為封左路既關係只可以係山頂望落去。

1944年美軍重奪關島，駐守關島既日軍係失去制空既情況下死守，
曾經有三千名日軍係美軍軍機監視下係又木山集結，
又木山亦都係日本守備軍司令小畑英良中將自決既地方。

戰後為左紀念戰死既軍人，日本民間組織係又木山興建左慰靈碑，
亦即係黎緊去拜訪既South Pacific Memorial Park。

內閣總理大臣 = 首相

第二十九師團步兵第十八連隊，1944年駐紮關島既守備軍。

獨立自動車第265中隊，唔熟陸軍編制，
唔肯定呢支係戰鬥部隊定後勤部隊。

第521海軍航空隊，負責馬里亞納群島同帛琉區域既攻擊機隊，
主力機種係彗星同銀河，可惜係美軍開始登陸戰之前大部分飛機已經被摧毀，
解散後機組人員加入馬里亞納海軍航空隊。

順帶一提，海軍航空隊入面除左有航艦上面既航空隊，
仲包括左陸基基地既航空隊同飛行員訓練學校。

除左慰靈碑，仲收集左日本軍既遺品，多多少少了解到當時既生活。

日本守備軍司令小畑英良中將

除左日方有紀念碑，美軍亦都設立左一個去紀念關島戰役。

關島既天氣變得好快，由曬太陽去到傾盆大雨都係十分鐘既事，
"一條濕滑既公路，加個粗心大意既司機"
行行下果陣對面線架車突然轉左入路口，留意美國係左軚，右上左落，
我踩盡brake加轉左都係撞中左佢車尾，一來距離太近，二來落大雨既車好難踩停，
好在兩邊司機都無事，落車確定左安全就即刻打911，
同左佢講撞車，無人受傷，但車行唔到要call拖車，
報完警打左俾租車公司，佢地都搵左個staff(啊老細)過黎。

示意圖，我係藍色車，佢係紅色車。

大約十分鐘road service就黎到，仲早過警察，
到左之後先拉左架車埋路邊，再問我地拎passport同車牌，
抄完之後再問左我事發經過，目的地去邊etc etc etc
問完就同我講話係對方司機違例，所有損失都係由佢份保險去賠，
跟住出左張報案紙叫我俾租車公司，之後既野交俾佢地去搞。

我十八歲考牌，之前最大單都係入停車場果陣劃花左bumper，
(Estima 窄路上斜又趕時間心急)
呢次都算係揸咁耐車以黎最大單既意外。

做完哂手續架車就直接拖左去維修中心，
要等佢保險出左先開始整，即係架車要hea係到一段時間。
之後老細車左我返去租車公司，佢話理應係要replace一部車俾我既，
但係因為佢其他車都full book所以退返錢俾我。