201709 日本群馬鐵道之旅: 番外篇 信越本線碓冰峠歷史 第一章 信越本線由來

行開橫川，順手寫下信越本線同碓冰峠歷史，
信越本線由1885年起工至1904年通車，
1905年8月1日時刻表改正之後開通左上野至新潟既直通列車，
0600由新潟出發，同日2100到達上野，途中會經過三間鐵道公司既區間，
分別係日本鐵道(上野至大宮，大宮至高崎)，官設鐵道(即日本政府，高崎至直江津)，
以及北越鐵道(直江津經由新津至新潟)，
呢個時間大家熟悉既國鐵(日本國有鐵道)，甚至鐵道省同鐵道院都尚未成立。

三間鐵道公司既區間，車站名沿用1904年全線通車時候既資料，
日本鐵道為藍色車站，官設鐵道為綠色車站，北越鐵道為紅色車站。


去返日本鐵路既草創時期，原本日本政府對鐵道政策既方針一直都堅持要”官設官營”，
由政府主導鐵路既建設同營運，
但政府既財政因為戰爭等各種原因支持唔到興建鐵路既龐大支出，
而各地對鐵道既交通需求日漸增加，政府唯有將興建鐵路既權力下放俾民間財團，
1881年 (明治14年) ，日本第一間既私設鐵路 – 日本鐵道成立，
日本各地既財人紛紛效法興建私設鐵路。

九州鐵道會社鐵道布設免許狀，1888年 (明治21年) ，九州鐵路紀念館藏

北越鐵道路線圖，年份不詳 ，新津鐵路資料館藏

直到1906年3月31日，公佈鐵道國有法 (明治39年法令第17號)，
宣佈政府會收購17間鐵道公司作為國有經營，展開日本鐵道既全盛時期。
上述兩間私設鐵路都係係呢個時候收歸國有。
1909年10月12日公佈”明治42年鐵道院告示第54號”，
正式將由高崎經長野至新潟既路線命名為信越線，
1914年6月1日改稱信越本線，名稱一直沿用至今。