201709 日本群馬鐵道之旅: Day 2 やまどりもぐら

到左水上之後可以駁另一班觀光列車やまどりもぐら經上越線去越後湯沢，
中間會經過一個好出名既秘境車站，上越線土合站，
群馬縣最北車站，群馬縣最快，秋名山，藤原文太
佢出名既地方係佢上行線同下行線中間高度相差有81m，
為左連接兩邊既月台，係山中間起左足足486級樓梯，
單程上落大約要十分鐘，以前仲係有人駅果陣下行列車係發車前十分鐘就會停止入站，
樓梯中間仲會有長椅俾你休息，設計果陣係有預到位置起扶手電梯但最終無起到。

過左土合之後，一出新清水隧道就已經係JR東日本新潟支社既範圍。
順帶一提，清水隧道一共有三條，
清水隧道，1922年開工，1931年開通，全長9,702m，現服務上行線，由新潟向群馬方向
新清水隧道，1963年開工，1976年開通，全長13,500m，現服務下行線，由群馬向新潟方向
大清水隧道，1979年開工，1982年開通，全長22,221m，現服務上越新幹線，複線

呢次會行既係新清水隧道，大清水隧道我上下行都搭過好多次，

係差新清水隧道未行過，可以搵次係越後湯沢搭返落群馬。

個位好舒服，伸直對腳都唔會撞到前面。

前面有展望席位置，但係要入隧道既關係會拉簾。

除左土合係一個起係隧道入面既站之外，
佢前一個站湯檜曾都係起係隧道入面，但湯檜曾上下行月台既高低差就無土合咁大，
除左土合同湯檜曾，隧道入面既站仲有北越急行ほくほく線美佐島駅、
えちごトキめき鉄道筒石駅(舊北陸本線第三方集團鐵路)、
野岩鉄道会津鬼怒川線湯西川温泉駅。
(只計現時仲有營業既車站所以無寫埋青函隧道既三個站)

係土合會停20分鐘，即係係20分鐘之內要行486*2=972級樓梯再加影相，
所以個個都係就到已經起哂身去門口準備起跑。

一落車望見個終點，即係最頂有光果到，心入面剩係想講粗口。

用左十分鐘狗衝左462級上樓梯，個個去到頂(其實未到)都係索哂氣，
好在係高崎上車之前買左支水，唔係真係死俾你睇。

由頂望返落去，仲有好多人努力緊。

"辛苦哂啦，改札口仲有143米先到，兩條樓梯總共24級，加油啦!"

終於到左一半了，因為仲有回程....

呢邊係上行線月台，已經重見天日，
月台停緊既係上越線E129系列車開去水上。

日本一のモグラ駅，日本第一既地鼠車站

然後開始回程又落返462級樓梯，好似行極都行唔完咁，

一來驚架車會走所以逼自己係咁行，

二來車掌會用個大聲公係下低不停提你仲有幾多分鐘就開車。

一出隧道就已經係新潟。

終點越後湯沢，可以轉新幹線返東京或者去浸下溫泉，
我就劃飛上新潟會合朋友。