202606 德國漢堡睇博物館: Day 3 勞動博物館
一早起身天陰多雲，
琴晚食完巴伐利亞野突然好想食個巴伐利亞早餐，i.e. Weißwurst + Weissbier，
係Google Map search 下見到有間肉店話有Weißwurst，
隔離仲有個公園可以散下步，就搭車去行下。
明明我係Google Map見到係肉店Mix Cafe。
https://maps.app.goo.gl/6LnxMCZuiFhyEhX47
去到係間自動售賣機，仲係個貨倉區出面。
除左有時上面d鹽會重手左少少之外。
食完野坐下公園。
唔出去旅行就一日只要係醒住就會對住個Moon，
尤其係在家工作既人，唔落site唔出去開會既話，
每日就係起身由床行去寫字檯開機做野。
有陣時係起身直接開機做野，做做下野先發覺連牙都未刷，起身未出過房門，
久而久之成個人好容易會無左動力。
所以有陣時係日本/泰國屋企就算唔洗出門我都會拎台電腦出去搵間Cafe 坐半日，
日本既話首推コメダ珈琲店Komeda，中京i.e. 名古屋牌子，
早餐500 JPY一杯野飲半份多士一隻蛋，
屋企附近果間除左weekend有人排隊，一般可以坐半日。
遲下起注文住宅既話，想至少要分開睡房書房兩個範圍。
泰國就好盛行出去做野，佢地唔係好鍾意留係屋企，
一來佢地覺得係曼谷既Condo唔係真正既「屋企」，
佢地係偏好住一戶建一家人一齊住先叫屋企，
所以好多都無咩話點佈置間屋同住到好minimum e.g. studio就算。
平時Day time做野就去Cafe，Starbucks / Cafe Amazon基本上唔趕人，
仲有Free WiFi同插座叉電，
我屋企附近果間Starbucks定時定候會切d餅出黎派，
因為雪櫃賣唔去既夠時間都係扔落垃圾桶，
會切開細細餅一人派d咁。
坐係公園唔睇手機(盡量)，散下步吸下新鮮空氣個人都精神d。
所以有d DB同U Bahn並排既路線要有兩組唔同既軌道。
Barmbek算係一個大站，U3可以轉S1同U3有條盲腸線都係係到出發。
因為平民根本無負擔得到既照明工具俾佢地係夜間活動。
蠟燭既原材料蜜蠟唔係一個隨處可見既資源，甚至需要係海外入口，
其一樣對於佢地造成衝擊既就係「返工既紀律」，
唔同以前想做就做想訓就訓，要按照機械流水線既速度去「配合」機器，
當時既勞工保障亦都無現代咁完善，
老闆同管理層只係當員工係機器既一部份，
定時返工定時放工(?)既其中一個體現模式就係「打卡鐘Stechuhr」，
呢個展品又係好有趣，係一個「可拆裝式」既白領。
白色襯衫清洗同漿熨都好麻煩，亦唔似而家可以買十件輪流著，
戴「白領」文職同著工衣既「藍領」。
原來係個飯盒Essenträger (Henkelmann)，
當城市開始發展，電燈既出現令人每日可以利用既時間延長，
除左工作，休閒娛樂都開始多元化。
展品係1914年2月17日既娛樂晚會門票，僅限受邀會員，
睇完劇之後仲有舞會，係一整晚既社交聯誼活動。
1914年係一戰爆發直前但漢堡市民仍然有餘裕去參加文娛活動。
下一件展品係由漢堡電力博物館Electrum借出，
之後我都去左參觀，展品好豐富同Staff好Nice，去到再講下。
最初既「電費」係以「幾多盞燈」黎計價，
因為當時無一個準確既裝置可以計到用電量。
於是呢個轉插應運而生，直接擰上燈座就可以分出兩個插座出黎俾電器用。
見證左由蠟燭照明，去到有電燈，再去到可以用電器協助家務。
工廠既動力亦由人力或者蒸氣機轉成電力。
下一個展區，博物館將一間係1989年倒閉既既襟章工廠既設備全部收藏展示，
特別既地方係工廠入面既設備大部份都係1930年代生產，
連倒閉前既運作模式都係沿用人手生產，
似亞洲既「山寨廠」模式，成間廠得十個八個工人，
家庭式經營同無大型機械輔助。
另一個特別既地方係佢曾經被選為Nazi既軍工企業，專門生產徽章，
即使係戰爭時間仍然能夠獲取重要既金屬同化學品資源。
戰後工廠主力生產船公司既徽章同其他民用訂單。
樓上講其他行業，有一個部份係講印刷業。
正如之前提過，印刷術既出現其中一個好重要既轉變，
係將書本入面既知識由只有少數人掌握去到平民都負擔得起既程度。
亦都將「編書」既主導權由教會轉移到非宗教機構。
活字印刷術由面世開始一直沿用左五百年，直到被柯式印刷同凹版印刷取代，
1815年開始出現印刷機械化，去到1900年代的排版機械化，
去到傳統活字印刷完全被取代，中間所需人手不停減少。
咁當時既老闆同工人係點樣應對呢d技術同工作模式既改變，
就係呢個展區既主旨。
「當新技術出現既時候，工人點樣面對職業被機械化同淘汰？」
講「活字印刷術」，第一樣野當然係要個「字」，
有專門既工人活字鑄造工Schriftgießer負責生產字粒，
當時係用鉛同錫等等低熔點既金屬鑄造。
書入面每一個字母、數字、標點符號都係咁一個一個鑄造出黎。
有左字粒，下一個工序就係排字粒然後印刷，
由專門工種排字工Setzer按書本既順序去排版，
再交由印刷工Drucker去印刷。
博物館入面講左個好有趣既故事。
"Zween Buchdrucker sind sich selten einig." 兩位印刷師傅很少會意見一致。
意指「專家之間也常常意見不一」
兩個工種之間既工作內容完全唔同，技能亦都唔一樣，
但係整個工序入面缺一不可，經常係工作上出現磨擦同分岐。
甚至互相以熊Bären同猴子Affen互相嘲諷。
猴子Affen係排字工既蔑稱，
因為係字盤前執字粒既動作雙手好似猴子咁兩邊執，
同時排字工既知識水平要求比其他工種高，
除左要識唔同語言既文字同字型，
仲要識計算同設計文章既排版，
學徒訓練期亦比其他工種長一年（共五年）。
熊Bären係印刷工既蔑稱，
因為當時既印刷機係由人力操作，
要用力將模版印落紙上面。
同時要負責係模版上油墨，
整整下就一手一衫都係油墨，
排字工用黑熊黎取笑印刷工又讀得書少(少一年)又污糟又剩係識用力。
當時印刷業行會非常團結，技術亦非常專門，
成功逼使政府限制印刷廠數目，
所以大量學徒即使畢業之後都搵唔到野做，
要去第二d城市做臨時工。
當時漢堡印刷業監督官有句說話
"Der Buchdrucker ist die unlenkbarste Creatur" 印刷工是最難以駕馭的生物
感覺似我後生果陣d supervisor會俾我既評語w
btw 留意呢句，一陣會提到
整套設備係由一間小型印刷廠搬入博物館，
完整咁保留左排字同印刷既設備。
1925年果陣，一個熟練既排字工可以一個鐘完成1700個字既排版，
但實際上排版既工作只佔三分一時間，
其他時間用黎組裝版面同校正。
按紙張大小同字型大小設定好尺寸就可以開始放字。
執字粒既排字盤Setzkasten，
上面既大格細格都有講究，同現代既鍵盤一樣。
e / n / i / a 呢d常用既放大格，
q / x / y / z 呢d少用既放細格。
A B C D E F G H I K <- 無J
據ChatGPT所講，係活字字體入面I同J基本上係一樣，所以無特別區分。
細階亦比大階常用，一本書入面基本上95％都係細階。
右下F開頭既特殊字粒，fi / fl / ff / ft / ch / ck，
係為左印刷美觀而特別制造。
E.g. f i 分開排既話，i上面既點好容易就會同f個頂痴埋一齊。
正中下同右下角係空白鉛塊Ausschluß，
排版果陣要左右攝岩個間距同space。
最右角係「雜物格Quadrat」，
有d咩未得閒執返既字粒就扔住落去先。
當排好一整頁，就可以放上印刷機準備印刷。
印刷工通常係兩個人一組，
一個人負責上墨Ballenmeister，一個人負責壓印Preßmeister。
上墨係用墨印將墨點上字模，太多同太少都唔得，
順帶一提，個墨印上面塊皮係狗皮黎，因為夠薄同夠軟，
最緊要係無汗腺，油墨唔會吸收左入去墨印入面。
壓印係用機器上面既橫桿旋轉，將紙壓向字模，
一般印刷機會固定係天花板避免機器翻倒。
另外調配油墨都係由印刷工負責。
一部印刷機一日可以印到200-300份成品，
當時既《漢堡通訊報Hamburgischer Correspondent》，
係1806年每週出版四次，印量達到三萬份，
出版社同時用12台印刷機，同一版面做成6套活字版去印刷。
1830年更加每日發行，讀者遍佈德國、丹麥、瑞典、荷蘭、奧地利、波蘭等，
曾是歐洲發行量最大既德文報紙，亦都係德國歷史最悠久既政治報紙。
以全人手達到呢個規模既印刷量係當時黎講係好革新，
除左新聞既影響力，更加成為官方公佈既渠道。
去到機械既時代，
由全人手操作既印刷機，每人每小時100份，
到1814年引入快速印刷機，每人每小時1100份，
再到1832年引入改良快速印刷機，每人每小時2400份，
短短二三十年時間，生產量急升24倍。
印刷工原本以為機器會令自己失業，
但反而因為書籍同報紙因為生產量上升而售價下跌，
更多人有能力去接觸紙本，甚至有餘力出版宣傳單張。
係需求上升既情況下，反而令到更多印刷廠成立。
之前提過，對老細黎講，
印刷工既行會同印刷工本身都係好難控制既人力資源。
老細有好大誘因去用機器取代難管理既印刷工。
自從有左快速印刷機之後，
工序縮短成準備版面然後放紙就完成，
對體力同技巧既要求比以前少左好多，
老細自然開始諗縮數。
當時出現好嚴重既勞資鬥爭，
印刷工人既立場係「機器應由受過訓練的工人操作」，
老細既立場係「引入左先進既機器，操作比以前簡單，可以請d低技術工人」。
當時老細諗第一個既縮數就係請女性/學徒去做一d非技術工作，
例如：送紙，用更平價既勞動力去取代原本由專業工人擔當既職位。
令到印刷工當時好「敵視」工廠入面既女性工人。
1814年《泰晤士報》甚至要深夜秘密引入印刷機，
因為出現唔少事件係工人怕被機器取代而毀壞機器。
去到科技一路發展，連「送紙」呢d非技術工作都俾機器取代，
後期只需要幾個工人設定好機器，
再用女工甚至係童工將一疊疊既紙送到機器，
再將成品拎走就完成哂整個生產流程。
當時既非技術工種除左作為輔助既勞動力，
仲作為機器既「動力」，因為蒸氣機仲未普及，
機器有個踏板去驅動機器*，亦造成好多危險情況。
1839年同1853年出現童工保護法同蒸氣動力既普及情況先有所改善
* 舊時代啊媽部勝家車衣，唔洗插電，隻腳一路踩部衣車就會行。
有意思既係呢幾部印刷機都係動態保存，
上墨水同擺紙就可以再用黎印刷。
頭先提過既排版用既空白塊。
成品
以PM諗法，「十個女人可以係一個月生一個BB」
工程師一直都係到諗有無咩方法可以將執字粒呢個流程自動化。
中間出現過唔少機器輔助
暗指用左機器之後，女性工人亦都有能力可以取代排字工，
排字呢個工作自真正進入現代化。
從本質上改變左排字工既工作模式。
到Linotype係1906年已經可以做到一小時6000字。
可以完成三到四名傳統排字工既工作量。
但正如之前提及，當時德國既印刷行會力量非常大，
排字機係1895年已經係美國廣泛使用，
德國要係1907年先成功引入，
工會更加要求只有完成四年學徒訓練既排字工先可以學習同操作排字機，
除此之外，更明文拒絕女性排字工，
同剛才印刷部分有女性廣泛參與唔同，排字工基本係男性。
* 某程度上女性可能會更勝任排字工。
留言
張貼留言