202606 德國漢堡睇博物館: Day 6 不萊梅

行完博物館，另一個黎不萊梅既主要目的 - U2540潛艇既技術博物館。
U2540係XXI型潛艇，二次大戰末期先服役，
係第一艘真正意義上既「潛艇」。

係XXI型面世之前既「潛艇」嚴格黎講只係一隻有潛航能力既水面艦，
平時巡航既時候係浮上水面，
只有戰鬥或者避深水炸彈既時候先會潛落水下，
亦都係點解盟軍可以用雷達同飛機瞭望既方法搵到潛艇，
因為佢本身都係浮係水面。

XXI型最革命性既地方係佢能夠係水下長時間航行，
係潛望鏡深度，靠一條排氣管打著柴油機為電池充電，
以前係需要整隻艇浮上水面先可以開柴油機。
對比起舊型既U boot，更新左大容量電池同更大既摩打，
外型上亦都同前期型U boot唔同，
更加流線型既設計令到水下潛航速度大幅提升。

XXI型並無投入實戰，1945年既納粹德國已經係強弩之末，
盟軍同蘇聯兵臨柏林城下，為左避免潛艇落入盟軍，
船員係波羅的海自行將 U-2540鑿沉，
直到1957年打撈修復，一直作為訓練艦服役至1984年，
係不萊梅港保存成為博物館。

元首：

瞭望塔上面有天線，潛望鏡同主動被動雷達各一，防空機槍兩組，
主動雷達係用黎尋找目標，
被動雷達係用黎接收雷達信號睇下有無盟軍驅逐艦係到搜索緊。

潛艇當時主要既任務係攻擊盟軍既商船，
北美出發前往英國既貨船因為護航機既航程問題，
係大西洋中間會有兩至三日航程完全無空中掩護，
U boot用著名既狼群戰術係呢個空白區域用魚雷同艦炮擊沉商船，
盟軍利用驅逐艦組成輪形陣(日文，中文唔太肯定)，
商船係中間，船隊既前後左右都有驅逐艦護航。

係太平洋戰場盟軍用同一個戰略集中攻擊日軍運輸船，
截斷日本本土同東南亞既航路，
令石油、橡膠等既重要物資運唔到返本土。
再者孤立左係馬里亞納群島同新幾內亞上既日本陸軍，
海軍逼於無奈用高速既驅逐艦充當運輸船運送物資去島上。

艇內既結構圖(館入面果張好難影得好)

最右邊艇首係紅色既魚雷艙，三層發射管同儲存倉
白色既係居住區，藍色既係艦橋
居住區同艦橋底下係電池艙
天藍色既係引擎艙，分別係綠色既柴油引擎同紅色既主摩打。

XXI型一共有六支魚雷管，全部係艇首，
亦係一個同舊型好大分別既設計。

舊型U Boot設有艇首四支艇尾一支魚雷管，
設計概念係用艇首魚雷攻擊商船後，
離開戰場既時候如果俾驅逐艦跟蹤既話，
直接用艇尾既魚雷反擊。

但XXI型既設計概念唔同，
與其俾人追上而反擊不如加速逃走，
放棄左艇尾既魚雷艙令到艇體本身更流線型，
提升潛航速度同減低聲納反應。

另一個革命性技術就係魚雷自動裝填裝置，
舊型U Boot填充魚雷，單憑人力同鏈吊係平穩海面都要15分鐘一支，
全部4支魚雷管完成填充可能要30-40分鐘時間。
XXI型既自動裝填裝置可以係10分鐘完成6支魚雷填充，
將裝填效率大大改善。

另外XXI型都比舊型U boot帶更多既魚雷，
由VII型既14枚魚雷到XXI型既23枚，
減少返航補充魚雷既次數，提升作戰效率。

魚雷就係用上面既魚雷艙門打側滑入艇入面，
每一次靠岸除左要補充燃油同食物等既補給品，
補充魚雷都係一個好複雜既工作，要小心輕放，
放好係艇入面仲要用綁帶紮好避免損壞，
唔係打中左但係啞彈就真係喊都無眼淚。

魚雷管出面仲有一個活門，射魚雷前要先打開，
加左壓既魚雷一放開頂槓就會將魚雷射出去。

右邊方型既排放閥Mündungsklappe係艇身同魚雷管中間既活門，
射魚雷前要先用手柄打開。
左邊既冬菇制就係射魚雷既制。

機械式既潛度計

個錶面有幾個有趣既資料

m Wasser 用公制米度水深

über Unterkante Kiel 深度是以艇體龍骨最低點計算
即係成隻艇既最底點而唔係水面艦咁用食水線黎做高度參考

C. WILH. STEIN SOHN HAMBURG 德國漢堡 C. Wilh. Stein Sohn 公司製造

δ = 1,015 較正時係用海水密度1.015 g/cm³做基準
標準密度係1.025 g/cm³，唔同海域會用唔同既基準去較正同換算，
少少似揸Cessna果陣要按metar較高度計既QNH咁。

Kl. 0.6 精度等級Accuracy Class 0.6，最大誤差約為滿刻度的 ±0.6%

400 m * 0.6% = 最大誤差係±2.4米

一般巡航同作戰深度係150m，300m係最大潛航深度，

再深會因為水壓影響船體結構。

當時有兩款主力魚雷，G7a同G7e，
同樣係潛艇用21吋魚雷(533mm)，重量同長度都相似，
因此可以共用魚雷管。

最主要分別係推進方法。

G7a係用蒸汽引擎推進，G7e電動摩打推進，
各有唔同特性，引伸出唔同用途。

G7a速度快射程遠同穩定，缺點係魚雷航跡會有一條白色氣泡，
艦上既瞭望員好容易就可以發現到魚雷甚至反推潛艇位置。

G7e用電摩打推進，航跡無白色氣泡*1，係水聽器*2既嘈音亦較少，
但致命傷係早期既G7e可靠性極差，
電池性能受溫度影響繼而影響射程，
深度控制同引信都有唔同既問題，
一直到改良型出現先逐漸將問題解決，
更發展出第一種聲響追蹤魚雷，會自動向螺旋槳音源攻擊。

IJN：「我地魚雷既導航系統叫預科練」
詳情可以去靖國神社遊就館睇回天既資料。

*1 當時日本既魚雷已經實裝艦用既九三式酸素魚雷同潛艇用既九五式酸素魚雷，
酸素即係氧氣，係魚雷入面除左有燃料缸，仲另外帶一個壓縮純氧缸，
係整個燃燒過程只會有可溶係水既二氧化碳同水蒸氣，
令酸素魚雷幾乎無任何航跡。

實際用果陣有其他問題，下次有機會見到再講，成件產品都好IJN風格。

*2 潛艇入面有兩種唔同既探測系統，
主動發信號去聽回音既聲納同剩係聽聲既水聽器，
聲納因為係自己發聲出去，係探測既同時會暴露自己既位置，
水聽器剩係被動去聽而家係海入面既聲去判斷探測位置。

成支魚雷只有最前紅色既部份係彈頭，
中間大部份空間係燃料缸。

每個隔倉中間都有水密門去隔開，
潛艇兵其中一個訓練就係點樣快速地通過d艙門，

當要緊急下潛果陣，全部非當值既船員都要跑去艇首，
用自已既體重將艇首壓向下以加速下潛。

正確既方法應該係要雙手捉住上面既手柄將個人「盪」入去。

我趁無人試左幾次，差d撞親腰骨，
都唔知d德國佬六呎高點捐入去。

海軍係一個上下階級好分明既地方，
由皇家帆船戰艦時代*3直到而家都係一樣，

主要可以分成上級長官，士官(Petty Officer)同水兵，

士官係最初級既軍官，通常係軍隊學校(等同大學程度，e.g. 日本既防衛大學)畢業，

水兵個要求就低好多，係海軍兵學校完成高中就可以入伍(e.g. 江田島同舞鶴既海軍學校)。

階級可以直接反映係待遇上面，

比香港更寸金尺土既潛艇上面，只有艦長係有獨立既睡房，
士官或以下既都係多人房，甚至係hot bedding。

Hot bedding係指兩個或者三個船員共用床舖，

因為船上一定會有三分一人值班，休息既船員就可以用床舖訓覺。
水兵更多係訓係魚雷倉或者吊床上面。

因為潛艇長期係水下，
通風極差同艇入面長期都有一陣柴油加機油加好多日唔沖涼既味，

生活環境非常惡劣。
所以直到而家，潛艇伙食都係比其他海軍艦種優質，
例如日本海自既潛艇一日係有四餐而水面艦只得三餐，

因為管理層都諗唔到仲有d咩方法可以提升士氣。

*3如果大家有機會行開去Portsmouth睇HMS Victory既話，
可以留意下總共有三個用餐區，
長官係餐廳優雅享受晚餐，
士官係下一層酒吧感覺既食堂食飯，
水兵會分開一個個小組係船底或者工作位置食。

艦長既睡房兼辦公室，
係艦橋隔離，一有咩突發情況只需要幾步就可以返到指揮位置

輪機長既單人房

士官餐廳

係出航果陣會充當貨倉放滿食物同補給品，
亦係管理層既會議室同病人既休息室，
甚至如果要做手術都係係呢間房，

因為係艦上少數有長檯既地方。

士官既睡房，兩層算好，
海自既潛艇到而家都仲有三層床，
中間果層我瘦到一碌竹咁都會卡關入唔到去，

有興趣可以去吳市既海自博物館睇下，
係大和博物館對面果隻大潛艇。

訓呢個位果個人兄應該會每日不停鬧個設計師。

潛艇比水面艦多一個工作就係要時刻掌控各個艙室既重量再調整壓水艙，
因為下潛既時候萬一前後重量唔平衡，
有機會導致整艘艇保持唔到水平，甚至垂直下潛直插海底。

每一日輪機長或者值日官會重新計算，
或者發射魚雷之後亦會重新計算，一枚G7魚雷大約重1500kgs，
一次齊射會係艇首減少9噸既重量，如果無立即注水入艇首既壓水艙，
艇首可能會抬起甚至影響浮力。

生活區底下就係電池艙，
可以講係潛艇上最危險既地方，
尤其係俾深水炸彈攻擊緊果陣，
一有水滴左落電池或者電池包裝破損，
隨時會釋放有毒氣體例如氯氣。

XXI型既電池總量係VII型潛艇既三倍，電池既重量達到230噸，
配合柴油機既換氣管令XXI型潛艇可以長期留係水下。

最大戰速1節可以潛航超過1小時，巡航速度6節可以潛航約 50 小時，

重新充電需要15至20小時。

瞭望塔下低就係艦橋，亦係成隻艦既指揮中心。

呢個區域係控制下潛姿態同方向，

每個控制面都有專屬既水手負責，
係下潛同上浮既操作，大副會直接指揮尾翼舵手同注排水去保持艇體平衡。
右邊兩組紅色同綠色既閥門分別係左舷(紅)同右舷(綠)既注水排水控制。

另一組壓水平衡艙既控制閥

兩組都係控制Auffüllz. Trimmz. 壓水平衡艙

紅色既閥門控制左舷Bb. = Backbord

綠色既閥門控制右舷Stb. = Steuerbord

對應英文係左舷Port同右舷Starboard

Oben = 上

Unten = 下

後水平舵既操控杆，類似飛機既Trim，
調整艇體到中性浮力。

下潛之前最緊要檢查有無艙門未關好，

呢個面板就係用黎檢查艙蓋既狀態。

同時會顯示各個壓水艙既狀態，係排緊水定入緊水。

呢個區域係控制速度，

左舷同右舷既螺旋槳可以分別用唔同既速度去操控轉向，
旁邊既「貓紙」係唔同航速時對應既轉速。

值日官既工作檯，有海圖同值日官會負責填航海日誌，

每一次轉向，下潛上浮，速度改變都要做紀錄。

潛艇上另一個重要設備潛望鏡，

可以俾艦長係唔浮上水面既情況下觀察海面，

根據唔同用途潛艇上有兩支潛望鏡。

搜索潛望鏡用黎廣域瞭望，體積較大，
光學設定亦偏向望遠；

攻擊潛望鏡用黎最終瞄準，體積較細，
對航行穩定性影響較低。

德國工藝

艦橋正上方就係瞭望塔，亦係主要出入口。

全艦60人既伙食就係係呢個廚房仔到煮食，

所有廚具都係用電。
同其他水面艦一樣，出海頭一兩個星期伙食通常都好豐富，
有新鮮肉類、蔬菜、雞蛋甚至牛奶，

慢慢開始新鮮食品食哂，
就會食薯仔同洋蔥呢d根莖類植物配香腸同麵包，

再後期或者延長任務時間就會開始每餐都係罐頭同乾糧。

順帶一提，當時既罐頭工業已經好成熟，

醫學界亦已經理解到大航海時代殺人無數既壞血病，

成因係欠缺維他命C。
所以係食品補給方面已經完全考慮到要足夠維他命C，

維他命C主要來源既蔬果唔易儲存，
所以透過一出發既時候先大量補充，航程中後期以維生素片維持身體所需，

另一個好「德國」既方法係軍需部將發酵酸菜都制成罐頭，
可以長期保存之餘亦保留一定程度既維他命C。

再穿過另一組生活區就係引擎艙，
長官同較高級既士官生活區係艇首，噪音較輕微，
初級士官同水兵既係艇尾既引擎艙隔離。

引擎艙其中一個重要裝置係吸收二氧化碳既空氣淨化系統，

原理亦好簡單，用Calcium Hydroxide去吸收空氣入面既二氧化碳，

即係中學IS實驗果陣吹氣入石灰水個化學反應。

係艦入面既二氧化碳濃度係以1.5%為警戒線，

嚴格黎講去到2％人體都可以正常行動，
但考慮到累積速率同通風系統既效率，
輪機組員會係二氧化碳濃度1.5%就開啟系統。

空氣濾芯係消耗品，每一罐大約可以維持4-5個鐘既運作，
而一次出海大約會帶450個空氣濾芯。

同樣概念既系統而家係太空船上面都會見到。

順帶一提，係船上左架(入左乾船塢)做維修果陣，

船艙尤其底艙係一個極危險既密閉空間，
重油艙係最高危，除左有d好似瀝青咁上下質地既重油結左一舊舊係艙底，
仲有唔同種既氣體E.g. Hydrogen Sulphide會沉係底，

唔郁佢果陣無事，但一搞起底層既油果陣部試氣機會即刻響。

U boat同大部份船都有至少兩台主機，

以防航行果陣突然間完全無哂動力同電力。

同樣螺旋槳同摩打都有兩組。

而家既貨船同客船除左船主機提供動力，
仲會有N+1既發電機做電力供應，

即使船主機出左問題都仲可以保持電力供應，
通訊，操舵，船員生活區，貨艙供電(E.g. 凍櫃)可以維持運作，
凍櫃有溫度紀錄器，到左貨主發覺有一段時間溫度唔岩可以唔收貨好麻煩。

而家既船主機已經好穩定，
好少聽話係海上面突然無左動力行唔到，
真係咁唔好彩出左事，船東會搵人飛零件去最近既機場，
再由代理送去船上做維修，
真係急同船東俾得起錢既坐直昇機飛隊人過去都仲得，

最差情況一定要上乾船塢先處理到但船又無左動力，
船東可以請遠洋拖船拖左架船返港口落貨先再上架做維修。