202606 德國漢堡睇博物館: Day 7 空中巴士工場見學

今日比較悠閒，剩係諗住去空中巴士既工場見學，
下午一點開始，地點係早幾日渡輪個總站再搭20分鐘巴士。
朝早無plan咩行程，訓到自然醒再去食個早餐。

搭幾個站去左市中心既湖邊公園散下步。

好鍾意呢d「並木道」，尤其係日本呢d四季分明既地方，
日本屋企附近有一條種左櫻花既並木道，
櫻花滿開果陣成條路都係粉紅色，
到落葉果陣一起風d花瓣會好似落雨咁飄落黎，
係日文有個雅稱叫「桜吹雪」。

以前唔明點解d鬼佬放假係搵個海灘或者泳池邊攤係到，
唔係好似我地後生果陣去日本6點起身行幾個景點再食食食食先返黎。
而家我旅行搵到一個公園悠閒地聽下音樂睇下雲望下天鵝就已經好放鬆。

除左訓訓下有個包頭頭咬住支大麻行過之外，
我都唔知原來啊拉係俾對草。

搭車去渡輪碼頭轉船，
連HVV管理既渡輪都同DB一樣會Fällt aus(停駛)。

上岸後轉巴士，簡單易明有個巴士站直接叫Airbus，
隔離有間Moxy平市區我住緊果間大約EUR30，
但每次出入都要搭巴士比較麻煩，同我搭巴士唔望前面會暈車浪...

未夠鐘，去Supermarket行下買杯野飲。
另一間德國常見既超級市場REWE，
無論係酒店定REWE我估計都係主要服務黎出差既Airbus人或者客。

漢堡係空中巴士四個組裝中心之中既一個，

另外三個係法國既圖盧茲，米國既莫比爾同中國天津。

漢堡曾經負責生產A380但停產後主力負責A320，

法國圖盧茲有能力生產哂主力既A320 A330 A350，

因航既新飛機都係直接派人去圖盧茲收貨同揸返亞洲。

空中巴士既生產線分佈各地，
再利用海運或者專用運輸機送到最終組裝工場，
例如機翼係英國生產，機身分段係德國同法國生產，
水平尾翼同垂直尾翼都係分別係專門工場生產。
引擎由客戶選擇既生產商(e.g. CFM)直接送去工場，
所有客戶自己選配既裝置例如座椅都係由客戶負責送去工場。

德國同法國工程師一齊造一個產品算唔算天堂同地獄對撼？

講起，A380一開始生產延誤既其中一個原因係漢堡負責造既機艙，
送到圖盧茲發覺唔岩裝，再睇返先知原來個軟件同圖紙版本都對唔上，
所以有時候Co-location 做野係有佢必要性。

漢堡既空中巴士工場係負責哂整個組裝，測試同移交既工序，
組裝好既飛機會直接由空中巴士既測試機師駕駛進行飛行測試，

當然工場內有自己既跑道同航空管制設施，

工場內總共有18000個空中巴士僱員外加承包商、供應商同客戶，

係漢堡既其中一個主要僱主。

成個工廠Tour都唔俾影相或者用手機，

都幾旺場我weekday去都滿額，大部份都唔係飛機膠純粹當個景點黎參觀。

帶團既係漢堡工場以前負責A380組裝既一個組長，
A380停產左就轉左黎帶Tour。

因為團友大部份都唔係飛機膠既關係，

個講解對我黎講唔算係好深入，E.g. APU都要解釋好耐究竟係咩黎。

工場入面既觀景台離實物又遠，連指都指唔到過去，

又係咩準備d圖或者介紹版，

同個婆仔講「呢個station係裝個垂直尾翼裝上body」然後成班老友記都RR頭咁。

Tour 會行兩個組裝工場同係巴士上睇機身同機翼倉庫，

如果Beluga係到既話會係車上睇埋但可惜岩岩飛走左。

仲有一個幾有趣既係參觀航空公司客戶既Demo中心，

有商務客位同經濟客位唔同座椅既實物可以俾客去試，

逃生滑梯既實物同講解(無彈開俾你睇，彈一次要幾萬蚊整返)，

另外仲有A380既上落梯，而家買少見少嫁啦(意味深)。

空中巴士同波音其中一個好大既分別係空中巴士基本主力係做客機，
甚少有公司全力用空中巴士既貨機機隊，

令某程度上機體既剩余價值比波音機低。

舉個例子，作為客機飛左二十年既747，改裝成貨機仍然可以開始第二人生，

尤其係日本航空公司JAL / ANA既747 / 767特別搶手，
因為保養同機身狀態都有「日本人標準」。

747可以打開機鼻既設計令上落貨效率更高，

四引擎提供更多既最大起飛重量，亦可以勝任特殊運輸例如超長貨物。

空中巴士主要係A320F作為短途快遞同將來既A350F用燃油效率優勢去競爭大型貨機市場。

Werks = BMW個W = 工場

空中巴士用黎運機翼同機身既特殊貨機Beluga XL，

由A330-200F為基礎改造，係原本機身上面重新構建貨倉，
可以將成段A350既機身或者兩組機翼同時運輸，
一共生產左六架，
據負責人所講Beluga XL既生產設施同模具等都完全保留左落黎，

萬一要再生產都可以重用。

波音相對Beluga XL係由747-400F改裝既Dreamlifter，

Dreamlifter個名係由佢主力運輸部件787 Dreamliner而黎
同Beluga甚至同其他747F唔同，Dreamlifter既貨倉門係係機尾同埋係打橫開，

如果想睇Dreamliner既話，去名古屋機場有機會會見到，

因為787既機翼就係係愛知生產。
生產商係SUBARU，無錯就係造車果間「掃把佬」，

前身係二戰時飛機生產商中島飛行機。

btw Tour既集合點本身係間手信舖，我見d團友一人都買返多少，

認真d飛機模型手工同設計都差左少少，

大Scale但details唔夠真係好責洗，連窗都唔勾線。

同埋我係波音fans所以係拒絕消費。

回程果陣見天氣幾好，係碼頭附近既餐廳食飯。

有個搞笑野，我落完單個伙記拎啤酒上黎果陣仲拎左盆貓草，
係泰國既習慣一上座會放一盆九層塔同生菜，可以用黎夾肉一齊食。

我諗緊係咪小菜一部份既時候見個盆有泥，無理由新鮮到咁嫁，

再周圍望下雖然係檯檯都有但無人會去搞盆野，
估計係真盆栽黎唔係拎黎食。