202606 德國漢堡睇博物館: Day 4 稅關博物館

食完野碌手機睇下附近有d咩景點，
見到有個「稅關博物館」好似幾有趣，
又正正係附近就行去睇下。

之前提過，漢堡為左方便通商往來，
係市內設立左倉庫區，只要唔運入德國其他範圍，
無論係儲存，轉口同加工都係免關稅。

過左橋之後就係倉庫區，橋兩邊有更亭去檢查出入既車輛，
有柏林圍牆果種分界既感覺。

博物館本身就係以前既稅關。

講起稅關，近年做多左國際生意先發覺香港係「自由港」係一個幾大既優勢。

E.g. 由外國入口零件去日本，要按分類逐件係日本稅關登記，
再由稅關既工作人員評稅，出稅單再交稅先放貨。
總額多過200,000JPY仲一定要搵專業報關公司去處理，
有d常做海外生意既日本公司會叫伙記去考「通関士」，
專責去處理出入口同埋聯絡稅關，
中間既文件同手續非常煩複，加上日本人既認真程度，
基本上無試過邊次係好順利唔洗補文件就放貨。
大貨我通常都係搵Forwarder成批處理，但亦好多時有奇怪甩漏，
我試過入左批Controller係成田落機果陣落大雨成批貨濕哂。

新加坡既話入口果陣會直接收埋消費稅，
呢d「正常」既國家都算易處理，
最怕係果d要「檯底傾」既國家，
呢d為左避免麻煩我都係直接搵Forwarder或者Fedex果d去負責door to door。

香港無論出口定入口除左特定商品，例如：煙酒、石油制品，之外都唔洗交稅，
出入口剩係需要報關用黎做統計數據多過去評稅。

稅關除左負責管理「正常」商品既出入口，
亦會遇到「唔正常」既物品，毒品就係其中既表表者。
收藏品中無大家熟悉既雙獅地球牌，
金三角應該轉左型做網上生意i.e.詐騙，
毒品由金新月(伊朗、阿富汗、巴基斯坦)去做。

從巴西入口既貨車，內藏左100kgs可卡因。

另一個係亞洲好少聽到既毒品 - 卡特葉。

原產地係東非同阿拉伯地區，當地人會將卡特葉放入口嘴嚼，
佢既汁液有類似安非他命既作用。

講卡特葉就一定要提也門。

也門位於阿拉伯半島，同阿曼，沙特阿拉伯接壤，
海岸線位於紅海同印度洋交界，係石油運輸既主要航道，
同其他阿拉伯國家一樣有石油同天然氣資源，
但唔係石油輸出國組織成員，傾向直接同油公司做出口貿易。
除左石油，亦盛產礦石同咖啡，
之前係交易所見到既Mocha就係位於也門。

咁卡特葉同也門有咩關係呢？
當地有個習慣，從下午開始就會攤係地下圍埋一齊嚼卡特葉，
i.e. 一齊吸毒，
同燒雪茄會口乾一樣，卡特葉一路嚼要一路飲水，
甚至屋企入面會有卡特房Qat Room專門用黎嚼卡特葉。

嚼卡特葉既普及程度係下午兩點鐘所有人都停手唔做野，
一齊去嚼卡特葉嚼到日落，每日會花三五個鐘去嚼卡特葉。
咁你會明白點解明明有石油有天然氣都可以窮到鬼咁。

最難搞既係大量種植卡特葉需要大量水資源，
也門本身亦極度缺乏食水同地下水資源，
而且大量農民種植卡特葉而非糧食或者咖啡等經濟作物，
加劇糧食價格上漲等社會問題。

去到現代歐盟成立之後，整個歐盟成為一個統一既關稅區，
大手商品例如石油同煙酒，用統一的程序、免稅規定同最低稅率。
但每個國家仍然可以開徵獨立消費稅，
例如德國既咖啡稅Kaffeesteuer，據講每年稅收可以去到10億歐元。

另外德國亦都有好多特殊既消費稅，開徵既歷史仲好悠久。

啤酒有啤酒稅Biersteuer，按酒精量同生產量課稅，
最早可以追溯到中世紀就已經有收徵啤酒稅，
由德國稅關徵收再分配俾各邦。

用電都有電力稅Stromsteuer，甚至係德國第三大既消費稅來源，

係1999年開始徵收，對再生能源有稅務減免。

咖啡岩先都提到過既咖啡稅Kaffeesteuer，

無論係入口咖啡豆、咖啡粉、即溶咖啡、甚至係咖啡糖同甜品都要課稅，
只有生咖啡豆唔需要課稅。

氣泡酒獨立有一個氣泡酒稅Schaumweinsteuer，
1902年德國皇帝威廉二世為左籌措海軍艦隊經費*而設立，
所以有個別名叫艦隊稅Flottensteuer，
至今仍然存在係德國既稅制。

葡萄酒則相反，只有1918年至1926年間收取過葡萄酒稅Weinsteuer，
但同樣係葡萄酒基底既氣泡酒就要收稅。

*講起為左軍費而設立既稅項，
日本既遺產稅(相続税)就係為左日露戰爭既軍費而開徵。

烈酒亦有烈酒稅Alkoholsteuer，
1919年立法既時候甚至係將烈酒銷售引入專賣制度，
直到歐盟成立先取消專賣制度。

預調酒稅Alkopopsteuer係近年為左應對便利店出現既預調酒而開徵既消費稅，

預調酒以廉價，用果汁/加糖令到好易入口，包裝五顏六色去吸引年輕人，
類似日本Strong Zero果種一罐500mL有9%酒精，
用果汁同糖掩蓋基底既廉價酒。

Offtopic講少少，黑田都算係一個酒鬼even某程度上已經係アル中(酗酒)，
但我本身就好少好少話會飲醉酒攤係地返唔到屋企果d黎。
我好唔推薦任何人去嘗試呢d預調酒，
因為呢個商品既出現本身只有一個目的，就係令你飲醉，
入面加左既色素同風味劑令你完全唔會飲到入面酒精唔好既味道，
亦好易飲太多然後醉到不省人事。
個人意見係飲酒可以，
但應該揀d優質既酒去「享受」酒既味道而唔係「買醉」，
同埋應該要控制到自己唔好做失禮人既事。

btw 我飲醉左既話係會一口流利既新加坡口音英文然後手會係意大利佬模式。

煙亦都係課稅品，煙草稅Tabaksteuer透過貼係煙盒上面既稅票收取*，
方便執勤人員去辨別係商店入面賣緊既煙係咪已經完稅，
煙草稅係德國稅收第二大來源。

*方式同泰國既酒稅好似，
泰國既入口酒類會有張粉紅色label貼係樽蓋封口去證明完稅。

石油制品既入口亦要徵收能源稅Energiesteuer，
最早可以追溯到1879年已經開徵既石油關稅Petroleumzoll，
無論係汽油柴油燈油(火水)定石油氣都要收稅，
係德國稅收最大來源。

(抱歉個館展版文字比較多，呢個區無咩特別既展品可以show)

另一個區係講冷戰時期，稅關係一個咩既角色。

當時西德係有郵政服務可以寄去東德，
但當然會俾人全部拆開檢查，

除左郵局，東德國家安全部a.k.a.秘密警察既郵政海關調查部門會進行檢查，
所有有文字同資訊相關既產品，例如：雜誌，唱片，書籍等會全部扣起，
甚至會對收件人進行調查。

當時德國邊境管制指示牌
Waffen = 武器

Funk = 無線電通訊設備

係冷戰時代，無線電通信設備係一個好敏感既器材，
even時至今日都係，E.g.船上既衛星電話係「某d國家」隨時引黎官非。

講完現代既稅關，就講下古代既稅關。

之前提到過一個概念，係德意志帝國成立之前，
各個城係有自己獨立既稅制同關稅。

主因係返到去13世紀，神聖羅馬帝國既政治權力分散，
行政權立法權司法權都下放到唔同既地方諸候，
甚至開始成立自己既軍隊、徵稅同發行貨幣。

理論上皇帝是全帝國最高統治者，

但同英格蘭國王、法國國王等君主唔同，
神聖羅馬帝國既皇帝無實質管治既領土，
無論財政定軍事都係依賴地方諸候、貴族、教會支持，
因此國家既方針一直都傾向地方妥協。

領主興建城牆之後，以城牆為行政界線，

亦係以城牆為界徵收關稅。

即係係異世界動畫見到果d排隊入城要交稅既場面，

除左貨物要徵稅，亦都有「人頭稅」按人口流動收稅。 

一個商人由漢堡運貨去奧地利，中間經過，

漢堡 -> 不來梅 -> 漢諾威 -> 法蘭克福 -> 紐倫堡 -> 奧地利

可能總共會經過二十個唔同既城邦，剩係關稅都要交幾十次，

一層層疊加既稅項，各地唔同既稅務制度同度量衡，

E.g. A地係收5%，B地係收12%，
C地係收每匹馬2銀幣，D地收每桶酒固定費用等，

可以想像到當時既商業活動非常困難。

過橋要收過橋費Brückenzoll，
過路要過境稅Passierzoll，
入城要收城門稅Torzoll，
係城入面做買賣仲要再收市場稅Marktzoll。

度量衡亦都唔係全德意志地區統一，

普魯士、薩克森同巴伐利亞三個州用緊三個唔同既長度標準。

唔知大家以前有無試過係中國做野，
當時中國既高速公路係分開唔同公司，
可以係A段由A縣政府起，B段由B市政府起，
每段「高速」公路可以係每二三十公里斷開，
出收費站，中間一段既一般道，然後再過收費站，

後生果陣有一次農曆年，有件零件要送去廈門急用，
司機一早就放左假，我同我師傅揸車由廣州去廈門，
臨出發果陣老細講「俾個籃你裝住d飛仔」

當時既構圖大約係咁

然後全程都係

入收費站 -> 行三十公里 -> 落收費站 -> 行一段幾公里既國道或者縣道 -> 入收費站

剩係d飛仔都一大疊

返返去頭先個topic，咁你話「我唔入城咁咪唔洗交稅」，
的確係可以繞開城市，但係城牆外既村莊係無衛兵，
當時路上面亦唔係絕對安全，
入城亦係少數可以做交易同交換資訊既地方。

當時引伸出一個字 Torschlusspanik 城門關閉恐慌，

現化意指「害怕錯過最後機會」或者「年齡焦慮」。

但當時真係同城門開關時間有關，

城門會係夜晚固定時間關閉，
如果商旅或者居民趕唔到入城，就只能夠係城外過夜，

面臨野獸、劫匪等危險。

所以市民會係城門即將關閉果陣趕路，

呢種種恐慌便稱為 Torschlusspanik，
後來再演變成形容人生中既「害怕錯過最後機會」。

當時係認真到有個365日既城門關門時間表。

水路作為當時既主要交通網絡，經過就已經要收過路費，

為左避免商船逃稅，稅關會係河面拉起鐵鏈，
甚至向商船開火逼使佢停船。

再黎就係點解當時既皇帝唔禁止呢d政策，

之前提到過地方諸候既勢力強大，
皇帝亦係靠貴族同地方力量支持擁立，

更甚至去到皇帝查理四世時，
正式確立同承認左選帝侯擁有關稅權同貨幣發行權。

關稅嚴重窒礙物流同商業活動，
亦都係因為咁引申之後漢薩同盟既出現，
以商人行會既力量去同領主談判，
以獲得關稅優待或者通行特權。

16世紀皇帝查理五世曾經想將關稅由地方稅轉成國稅，
係貨品入口神聖羅馬帝國範圍既國境關口收取，
而境內則唔需要再收關稅。
想當然唔會成功因為關稅已經係地方財政既一大來源。

17世紀更開始利用關稅作為貿易保護手段，

提高進口稅以保護本地產業，方法同現代既政策概念相同。

一直去到19世紀，係普魯士主導下建立德意志關稅同盟Zollverein，
德意志各邦之間既內部關稅先逐步取消，
亦到為1871年德國統一奠定經濟基礎。

同盟仲建立左統一的度量衡制度同貨幣體系，
將「德國」由一個封建國家銳變成現代化經濟體。

可以講德國國家統一，
某種程度上係由「關稅統一」開始而唔係政治統一開始。

博物館都有輕輕帶過關於稅關職員係牙希個年代併入德國軍隊，係咁易講下。

行完館出黎散行步，未係好肚餓突然好想飲下湯，
搵左間俄國菜既餐廳整個Solyanka暖下胃。
我本身唔識伏特加，一直都當佢係レモンサワーd廉價酒精，
直到前幾年去波蘭先體驗到伏特加有趣既地方，
我幾鍾意果d奇怪草藥味既伏特加。

係注文果陣我問個staff

黑田「有無咩vodka介紹下」
Staff托左下眼鏡「我地有d homemade既伏特加，你要唔要試下」

佢叫左我埋去counter開左個樽俾我聞下，
係幾過癮既奇怪草藥味非常岩我口味。

食完野又散下步，係車站搵左間酒吧睇波同買左個kebab返去酒店做晚餐。