202606 德國漢堡睇博物館: Day 6 不來梅 - 德國海事博物館

星期一一大早起身行去Hauptbahnhof。

係漢堡市內玩左咁多日決定出城去不萊梅行下。
係DB 買last min飛，漢堡來回不萊梅只需要EUR 19.9，
正價飛要EUR 43甚至搭RE都唔止。
但呢個優惠只可以買ICE同必須係前一個週末買黎緊一星期一至五既飛，
同埋唔可以轉車次，亦無指定座但可以加EUR 5去加指定席劵。
我都有諗過星期一一早會唔會好多人出張，
但check左班車有餐車同成程都只係一個半鐘，最多都係企車頭車尾。

漢堡係德國北部既大站，S Bahn U Bahn RE RB都會經過，
有ICE揸去德國南部，亦有ECE揸去哥本哈根。

係車站食個早餐，原本想留肚上車食，
但早到得滯仲有成個鐘先上車，搵d野食下先。

去不萊梅坐RB大約兩個鐘，
但係漢堡揸去西邊既ICE都會經過不來梅，班次都算好多。

個月台有幾百米長而唔同車既編成有長有短，
可以睇ABCDEF搵返個車廂，
大部份車都有1st Class 2nd Class，特價飛當然只係可以買2nd Class。

係漢堡咁多日都唔識讀個州名Schleswig-Holstein。

漢堡都市區係HVV，一行到入下薩克森州就係另一間公司負責。

漢堡出發既ICE大部份都唔係係Hauptbahnhof做總站而係附近既Altona，
但會係Hauptbahnhof大約停10分鐘上落客。

雖然成日都笑DB，但佢個APP真係做得唔錯，
查乘換案內，買飛，仲可以bookmark班車有Delay果陣會出push notification，
ICE517會由漢堡，經不萊梅，科隆，法蘭克福，斯圖加特，一路行到去慕尼黑，
全程1076公里，9個鐘車程，其實有機會既話想試一次搭全程。

可能因為太早班車無咩人，好容易就搵到位，

有個歐洲車好特別既地方係無論ICE定普通車，
係座位邊都有個垃圾桶。

車入面有行李架同係餐車前後既車掌室附近，有家庭專用個室。

因為係自由席 ＝ 「你見到無人坐就可以坐」，

係每個位上面都有個display寫住而家坐緊既乘客會坐到咩站，
所以搵位果陣係可以知道個位有無人坐緊。

無人坐果陣

Check in 左之後

呢個Check in可以用DB APP直接做，
個位上面有個QR Code，Scan左佢會直接連左你張飛同個座位。

咁呢個係DB，自然總係有d問題，
我坐呢個位係 103 104 + 107 108，
個QR Code Scan 左係得103 107，
變左最終都係要手動入。

架車出發前係唔俾Check in，
我估係唔俾人預先霸位。

Check in完會Show係DB APP入面，
仲有一個好處係Check in左之後車掌就唔會問你查飛。

車上有Free WiFi，Landing Page係班車既實時資料，

做得好過好多航空公司，仲可以Order野食野飲。

係我撚緊個Landing Page果陣，竟然會有車內販售，
雖然只得咖啡但仍然好旺場，我同對面個哥仔，
同下一行既乘客都有買，價錢正常無記錯係EUR4一杯。

無驚無險準時到達不萊梅。

今日要去既地方唔係不來梅市內，

係不萊梅以北既不來梅港Bremerhaven。

最初城市發展果陣，不萊梅位於威悉河河口，
係一個天然港口城市，但因為河沙積聚同船既食水愈黎愈深，

係不萊梅以北開始發展一個新城市 - 不萊梅港，作為碼頭用地。
到而家既行政結構，不萊梅港仍然係不萊梅市既一個飛地。

不萊梅港既德文Bremerhaven又係幾有趣，

港口係Hafen，我問德文朋友係咪因為發音所以由Hafen轉成Haven，

佢話唔係，再睇返原來Haven係低地德語既「港口」，
亦即係標準德語港口Hafen既古字，作為地名一直保留至今。

低地德語同英文、荷蘭文相似，
Haven係現代英文都仲係避風港、港灣、避難所既意思。

順帶一提，現代既標準德語係用高地德語為標準。

係不萊梅去不萊梅港係搭VBN Verkehrsverbund Bremen/Niedersachsen，

不萊梅同下薩克森州既交通公司，

問左售票處哥仔，佢話買日飛係平過買兩個單程來回，

剩係呢張飛仔都EUR 28，岩岩係漢堡去不萊梅搭ICE來回先EUR 19。

要打個timestamp去active張飛。

坐NordWestBahn北西鐵，

車上面都有WiFi，個Landing Page又係幾四正，

低地台車，有單車泊位，加減速力度都唔錯。

不萊梅港車站個樓底好高同天然採光好舒服。

再轉巴士去海邊，原本諗住行既但係好大風同毛毛雨，

咁岩又有車就搭巴士算。

一落車已經見到架U-boot。

一陣先返黎睇佢，先去今次黎不萊梅既目標，德國海事博物館。

對比起漢堡海事博物館，
佢有多d講現代既海事技術，
但深度就唔夠漢堡海事博物館好，
比較岩小朋友參觀，

同埋佢有一個部份大規模維修緊，比較起黎就失色左少少。

船廠設計船體果陣用既圖檯，

幸好我學師果陣已經係畫CAD既時代，

無咩試過趴係圖檯畫圖。

用黎做流體動力模擬既船底，

唔知點解呢類型既模型都剩係會造右舷。

而家既造船業由東亞既日本，南韓同中國主導市場，

一隻船既壽命大約三十年，好多時候唔止因為船體老化等保養問題，

更多係因為船主機既達唔到排放標準而需要淘汰。

拆船係一個極危險既行業，係已發展國家根本唔會有公司去做，
船入面既廢油，化學品，隔音隔熱用既石綿，

加上俾海水鏽蝕左幾十年既船體，

基本上係危機處處。

係已發展國家剩係做安全評估同污染物處理，
無返三五七年都唔會完成都前期工作，

所以船東為左避免麻煩，
會將船直接賣俾孟加拉，印度同巴基斯坦既拆船廠進行拆解。

移交左船既擁有權，有咩就搵新既船東 : )

睇國名你就可以想像到成個拆船工序唔會有咩法規可言，

唔會有PPE，工具係得支風煤槍同槌仔，

成艘船會直接用全速衝上拆船廠既沙灘，

工人直接係沙灘上面用風煤切開船體，

廢油同潤滑油直接就倒左落海 : )

船入面可以用既物品全部會回收，由電線，摩打，閥門，
到廚房用品甚至船員用既洗衣機同床舖都可以回收去二手市場賣，

某程度上個回收率係高過已發展國家。

成日俾人dis既連鎖店Nord See

一個幾有趣既展品

蘇聯時代純機械結構既潮汐計算機，

原本德國既潮汐資料係由天文台統一計算，

但東西德分治之後，當然西德既天文台唔會分享資料俾東德，

蘇聯投放左大量資源同人力先研究出「自主研發」既潮汐計算機。

隔遠控制既艦橋控制台。

有個煙灰缸係側邊係真好「昭和感」。

當時既德國係少數同日本一樣仲允許商業捕鯨既國家，

用鯨油生產唔同既脂類產品，鯨魚肉可以做肉食，

我係九州工幹果陣係居酒屋食過一次鯨魚肉，

比牛肉深色同好重血味，我自己就麻麻地岩食。

用鯨魚牙造既黑膠機唱針，據講可以令到音色更柔和。

有時你係船上見到一個個白色圓筒(最頂果款)就係救生艇，
比較舊式同細船用。

係船員學校，Sea survival係其中一個必學既課程。

放果陣要將引導繩綁係船邊再成粒藥丸扔落海，

入面有氣樽，當引導繩拉盡左，

個殼就會好似Louis爆甲咁彈開再自動充氣，

再逐個跳落海游個隻艇到。

艇殼入面有水壓計，當水壓多過十米(定十五米)就會自動deploy，

因為只有一個情況會出現有水壓，就係隻船已經沉左。

有機會打開完發覺隻艇係反轉左，艇底預先綁左d繩，

只要你用岩姿勢一個人都可以將隻艇反返轉，

錯方向既話好易一反果下俾氣樽爆頭，見過有傻佬中招。

隻艇入面有水，高熱量食物(好難食既朱古力)，急救包，
用黎發信號既鏡，煙霧同火炬，一個反射網用黎反射其他船既雷達信號，

補船既工具(同補軚既好似)同氣泵，

仲有魚鈎同手排，但汪洋大海係咪真係釣到魚就下回分解。

用品入面其中一個好重要既物品係量杯，

因為救生艇上既淡水有限，每個人都要按配額飲最低限量既淡水，

當一班人係一個封閉環境中無所事事果陣，爭拗就好容易發生，

細到飲多啖水都可以係引爆點，

為左「公平」分配淡水，一個量杯就係避免紛爭既工具。

新式既艇會有求救信標，
落左海或者手動打著左之後會將GPS地點直接射上衛星，

再由海事服務公司向最近既救難機構求助。

要求高既船公司會用硬式求生艇，

船員可以坐哂入去然後直接成隻艇滑落海，

比起著求生衣跳入海再游去艇安全好多。

二樓大部份位置都維修緊，

觀景台有一整個艦橋。