未来ガジェット研究所

一早起身野咬左兩啖包就落樓上車去潛水， 呢間潛店剩係搞體驗潛水，我費事揹咁多架生過黎所以無去玩船潛， 剩係帶左Mask同錶同相機。 天氣好好，終於有返D太平洋小島既感覺。 如果唔想濕身可以俾幾蚊去浮筒睇魚。 其中一個教練。 人地(海龜)心黎諗你班友阻住哂個海。 教練會帶幾條腸去引魚。 返到酒店沖個涼準備出去搵野食，藍天白雲有海風吹住真係好舒服。 "如何充分利用酒店設備" 由酒店行過對面K-mart果五分鐘路程都就黎熱熔我， 對左兩杯可樂先回返順條氣。  好似幾過癮咁，戴住個頭盔係海底行。 竟然0200至0900係禁酒，朝早想飲啤酒做早餐唔得既咩? 下午就係攤左係果張紅色梳化睇書吹海風，完全放鬆哂個人。 夜晚去左食牙買加菜，呢個係佢自稱既一人餐， 然而係未上齊菜... 仲有個主菜係到，呢個份量夠我食一日三餐， 結果我打包左雞翼返去做小食(點知食到第二日既午餐先食完)。

早排UO開左關島同塞班島既航線，一直好想去行下， 見咁岩有平飛就click左張去行下， 原本都係諗住去潛下水曬下蓆，但醒返起二戰果陣， 關島作為日本佔領過既美國領土，應該會剩返好多遺跡， 一於租車去睇埋。  仲撞埋車 一早起身走入機場，check in搞左一大輪， UO七點到九點呢段時間有好多班機出發， 去美國(海外屬地)唔可以online check in，死死地氣去排counter check in。   去關島既機唔可以帶液體，臨上機前會再check一次。 照舊UO A320。 關島入境都幾麻煩，填左三張表再scan哂十隻手指既指模， 搞左差唔多一個鐘先過完關，然後出到去搭左5分鐘的士~15USD去酒店， 係關島揸的士真係好過去搶。 酒店係expedia book，~100 USD一晚， 係關島算平 。 有浴缸又有企缸，個浴缸好淺浸得麻麻地舒服。 一個人訓兩張雙人床.... 紅色果張梳化都幾舒服，望住出面個海景有海風吹埋黎hea下睇下書咁。 第一日去到果陣天陰，之後果幾日都好好天， 但關島一落雨就落到好似黑雨咁，開盡水撥都睇唔到前面。 大鄉里出城，第一次踏足美國(海外屬地)，見到好多想像中美國會有既野， 例如呢種係公路邊可以泊車入去食野既餐廳(請自行加入西部牛仔同左輪槍)。 關島都而家都仲係美軍一個重要既軍事基地， 直昇機飛過你頭頂係件好平常既事。 係酒店行十分鐘有間 好大 既supermarket， 大既意思係你由入口行去一個角落要十分鐘。 你諗得到既野都有得賣，由野食野飲，衫褲去到傢俬電器都有， 仲附設藥房同餐廳。 順手食埋野先返去。 野食全部都好大份，個蒜蓉包我拎左返去做宵夜。 硬係覺得個包裝好面善，一睇返先知係菲律賓版既。 仲俾我搵到同鄉，合味道既力量。 係supermarket門口有shuttle出酒店街同duty free， 因為我黎緊幾日都plan左活動包埋酒店pick up， 後果幾日就自駕所以亦都無坐過巴士。 關島除左美國人多(廢話)，日本人同泡...

過年既時候係日本入手左大淀既艦模， 其實我一向都好鍾意四眼妹，溫柔，可靠既大秘書 兼驅逐艦宿舍舍監 ， 如果我無遇上榛名既話，我會娶四眼妹做我老婆。 千祈唔好俾榛名聽到，我驚俾佢炮決 大淀同其他輕巡唔同，佢係作為一艘指揮艦去設計出黎， 擁有索敵用既大型水上機庫同彈射器，良好既通訊設備同優秀既防空能力， 但艦炮只有由最上型移裝既15.5cm三連裝主炮兩基六門， 畢竟四眼妹唔係設計用黎帶領水雷戰隊衝鋒陷陣，呢點可以理解。 錨鏈今次無轉用到金屬鏈，我見佢原本既detail位都唔錯所以無郁到佢， 今次有樣野做錯左既就係個Planning做得唔夠好， 甲板上面既舊detail剷左一D又剷唔哂， 下次再做既話我會將所有一體成型既detail剷起哂佢， 用蝕刻/膠件重做個detail。 剩係個艦橋都砌左我成個星期，第一次砌呢類型既艦橋， 之前既五十鈴同驅逐艦都係差唔多一體成型咁滯， 一路睇圖一路研究點整個蝕刻片，痴完一層就上欄杆同水密門， 成左形之後再砌返D兵裝(電探，無線電，高射裝置同探照燈)上去， 我到而家都係未掌握到立體既蝕刻片應該要點搞， 尤其係呢個頂住個波既無線電柱同後面既桅杆， 痴到歪歪斜斜之餘仲要成日甩，俾佢搞到我一頭煙。 岩岩都提過大淀既防空能力唔錯， 佢自己一個已經有四基八門長十炮(九八式十糎高角砲)， 相當於秋月型驅逐艦既主炮門數， 再加上艦橋，甲板同飛機庫上面既25mm三連裝機槍。 據大淀係捷一號作戰既報告，主炮配合長十炮有能力係一萬公尺以外將12機編隊中既8機擊落。 同其他輕巡唔同，大淀既煙囪同阿賀野型一樣，採用戰艦式既集中煙囪， 我見佢煙囪既detail都算唔錯，所以無裝到金屬環筋。 後部桅杆上面有一組13號電探，又係砌到我無哂耐性， 不停痴完又跌痴完又跌痴完又跌，剩係呢支桅杆我都用左一晚黎整。 1944年既大淀，彈射器由原本既二式一號十型空氣式彈射器轉左成左普遍既吳式二号五型火藥式彈射器， 亦未能夠搭載計劃中既紫雲，只係搭載左零式水偵， 為左圓左大淀既心願(好似係)裝備左紫雲俾佢。 艦尾有爆雷投下軌同海軍旗。 材料列表 艦模 AOSHIMA 1/7...

由第一隻艦模到而家都砌左幾款唔同既艦，吹雪，白露，綾波，五十鈴，響， 但都係流於砌埋->上色->貼水貼，今次決定試下用多D技巧同配件。 今次應用左既技巧都係參考左Takumi明春既"1/700軍艦模型製作實例"， 如果有興趣既台灣書既書店會有得買/訂。 第一樣做既野係將原本一體成型既錨鏈換成金屬錨鏈， 錨鏈買到左佢推介既Pro Hobby 錨鏈，但未買到個錨鏈柱， 所以只係鑽左兩個洞放左條鏈上去試一試個效果。 佢本身都有錨鏈同錨鏈柱但係同個艦模一體成型。 買左盒OLFA既剷型刀片，用黎剷走而家艦體上面的錨鏈。 剷走左之後再用砂紙磨平。 趁仲有D痕跡，用個錐mark返個錨鏈柱既位置， 再用鑽咀鑽通由甲板落船倉既洞。  放條錨鏈上去試一試，感覺唔錯但未齊件要暫時停工。 第二樣做既野係將原本既膠炮管換成金屬炮管， 但香港搵唔到特制既金屬炮管，買左0.5mm既銅管再試下個效果， (銅管係0.5mm外徑，0.18mm內徑，127mm in 1:700 = 0.18mm，好似係) 我自己幾鐘意，但係就買漏左泥膠狀既畢地，未整到防水布既位置。 第一套試作品，用鑽咀係炮塔鑽個洞，再將炮管插入去，用AA膠痴實。 AA膠買左呢款，乾左唔會白化。 白露總共兩套12.7cm連裝炮同一套12.7cm單裝炮， 炮塔用左小型兵裝set既炮塔，上面既detail位靚過原裝既。 第三樣做既野係將原本既密封煙囪改成開口再加銅線加強質感， 暫時只係完成左開洞既工作。 待續。